क्रेडा ल मिलही बेस्ट परफ़ॉर्मिंग स्टेट नोडल एजेंसी अवार्ड

रायपुर, बीते तीन साल म बहुत अकन उपलब्धि अपन नाम करे छत्तीसगढ़ के बांटा म फेर एक पईत बड़का उपलब्धि आए हे। छत्तीसगढ़ म सौर ऊर्जा समेत नवीनीकरणीय ऊर्जा बर काम करइया नोडल एजेंसी क्रेडा (छत्तीसगढ़ स्टेट रिन्युएबल एनर्जी डेवलपमेंट एजेंसी) ल बेस्ट परफार्मिंग स्टेट नोडल एजेंसी बर लिए चुने गए हे। एखर अलावा 31 मार्च 2022 तक के अवधि तक छत्तीसगढ़ म सबले जादा सौर सिंचाई पम्प स्थापित करे बर तको अवार्ड बर चुने गए हे। ये अवार्ड्स नवीनीकरणीय ऊर्जा श्रेणी 2021-22 बर देहे जात हे। ये दुनों अवार्ड एसोसिएशन ऑफ रिन्युएबल एनर्जी एजेंसीज ऑफ स्टेट्स (AREAS) कोति ले देहे जात हे। अवार्ड्स संस्था के 8वां स्थापना दिवस के अवसर म अवईया 27 अगस्त के केरल के कोचीन (कोच्चि) म आयोजित अवार्ड सेरेमनी के समय देहे जाही। ये मौका म मुख्य अतिथि के रूप केन्द्रीय राज्य मंत्री नवीन अऊ नवीनीकरणीय ऊर्जा अउ रसायन अडु उर्वरक विभाग श्री भगवंत खुबा मौजूद रइहीं।