3100 रूपिया प्रति क्विंटल के मान ले होही धान खरीदी
किसान मन ल अब प्रति एकड़ के मान ले 23,355 रूपिया के होही जादा भुगतान
ये साल 130 लाख मीट्रिक टन धान खरीदी के अनुमान
राज्य म करीबन 40 हजार करोड़ रूपिया के होही धान खरीदी
धान बेच गए किसान मन ल घलोक मिलही एकर लाभ
25 दिसम्बर राष्ट्रीय सुशासन दिवस म किसान मन ल 3716 करोड़ रूपिया के बकाया बोनस के होही भुगतान
छत्तीसगढ़ म प्रधानमंत्री श्री नरेन्द्र मोदी के गारंटी म अमल शुरू
रायपुर, 21 दिसंबर 2023। प्रधानमंत्री श्री नरेन्द्र मोदी कोति ले राज्य के किसान मन ले करे गे वादा के मुताबिक राज्य शासन ह किसान मन ले समर्थन मूल्य म 21 क्विंटल धान प्रति एकड़ के मान ले क्रय करे के आदेश जारी कर देहे हे। मुख्यमंत्री श्री विष्णु देव साय ह कहे हें कि छत्तीसगढ़ सरकार जनता ले करे सबो वादा ल पूरा करही। हम राज्य के किसान मन ले 3100 रूपिया क्विंटल के मान ले धान के खरीदी करबो। राज्य म ये साल 130 लाख मीट्रिक टन धान के खरीदी अनुमानित हे। समर्थन मूल्य म धान उर्पाजन के एवज म किसान मन ल करीबन 40 हजार करोड़ के भुगतान होही।
जानबा हे कि राज्य म अब तक किसान मन ले समर्थन मूल्य म मात्र 15 क्विंटल धान के खरीदी करे जात रहिस, जऊन ल सरकार ह बढ़ाके 21 कुंटल कर देहे हे। धान के खरीदी 3100 रूपिया प्रति क्विंटल के मान ले होए म किसान मन ल प्रति एकड़ धान विक्रय म करीबन 23,355 रूपिया के जादा लाभ मिलही। पिछला सरकार कोति ले किसान मन ले प्रति एकड़ 15 क्विंटल धान के खरीदी अऊ चार किश्त म इनपुट सब्सिडी के कुल भुगतान ल मिलाके सबले जादा 41,745 रूपिया के भुगतान करे जात रहिस। राज्य म प्रधानमंत्री मोदी जी के गारंटी ल लागू करके किसान मन ले 3100 रूपिया प्रति क्विंटल के मान ले 21 क्विंटल धान के खरीदी करत हे। एखर से किसान मन ल प्रति एकड़ के धान बेचे म कुल 65,100 रूपिया के भुगतान होही, जऊन ओ मन ल धान खरीदी के एवज म अब तक होवत भुगतान ले 23,355 रूपिया जादा हे।
मुख्यमंत्री ह कहिन हे कि किसान मन ल धान बेचे म कोनो प्रकार के दिक्कत झन होवय, एखर खातिर सबो खरीदी केन्द्र मन म भरपूर इंतजाम करे के घलोक निर्देश देहे गये हे। उमन कहिन कि 25 दिसम्बर के पूर्व प्रधानमंत्री भारतरत्न स्व अटल बिहारी वाजपेयी जी के जन्म-जयंती ल हम राष्ट्रीय सुशासन दिवस के रूप म मनावत हन। 25 दिसम्बर के राज्य के किसान भाई मन ल प्रधानमंत्री श्री नरेन्द्र मोदी जी के गारंटी के जइसे 2 साल के धान के बकाया बोनस राशि के रूप म 3716 करोड़ 38 लाख 96 हजार रूपिया के भुगतान करहीं।
खाद्य अउर नागरिक आपूर्ति अउर उपभोक्ता संरक्षण विभाग कोति ले प्रति एकड़ धान खरीदी के सबसे अधिक सीमा 21 क्विंटल लिंकिग के संग होही। अइसन किसान जऊन अपन धान पहिली समर्थन मूल्य म विक्रय करे हें, ओ मन ल घलोक ओ मात्रा के अंतर्गत धान विक्रय करे के सुविधा देहे जाही। इहां ये वाले उल्लेखनीय हे कि राज्य म बीते 01 नवम्बर ले समर्थन मूल्य म धान खरीदी करे जात हे। समर्थन मूल्य म धान बेचे बर 26 लाख 86 हजार किसान मन ह अपन पंजीयन कराए हें। पंजीकृत धान के रकबा 33 लाख 15 हजार हेक्टेयर हे। समर्थन मूल्य म अब तक करीबन सवा 9 लाख किसान 42.20 लाख मीट्रिक टन धान समर्थन मूल्य म बेच गे हे। ये आदेश जारी होए के बाद धान बेच डरे किसान मन ल घलोक 21 क्विंटल प्रति एकड़ निरधारित मात्रा के लाभ मिलही।
