मुख्यमंत्री के हुकुम म लउहे कार्यवाही : श्रीमती अस्तला कश्यप ल मिलीस नवा राशन कार्ड

कांकेर, जिला के नरहरपुर विकासखण्ड के ग्राम शामतरा के श्रीमती अस्तला कश्यप अब बहुत खुश हे, जिला प्रशासन कांकेर ह ओ ला नवा राशन कार्ड बनाके दे देहे हे, अब वोकर राशन के चिंता दुर हो गे हे। नरहरपुर विकासखण्ड के ग्राम बादल म 05 जून के भेंट-मुलाकात कार्यक्रम मा मुख्यमंत्री श्री भूपेश बघेल ला अस्तला बाई कश्यप ह अपन दुखड़ा सुनात कहे रहिन कि हमन पति-पत्नी अलग रहिथन, हमार पास राशन कार्ड नइ हे, जेखर से हमला दिक्कत होवत हे, हमला राशन कार्ड देवाए जाए।
मुख्यमंत्री के पूछे म वो ह बताइस कि पहिली हम संघरा परिवार म रहत रहेन, जेमां सास-ससुर, जेठ-जेठानी अऊ ऊंखर दो लइका, ये प्रकार कुल आठ सदस्य मन के परिवार रहिस। अब हमन पति-पत्नी अलग रहत हन अऊ मजदूरी करके जीवन यापन करत हन। उंखर समस्या सुनके मुख्यमंत्री श्री बघेल ह श्रीमती अस्तला बाई अऊ ऊंखर पति श्री बलराम कश्यप के नाम म नवा राशन कार्ड बनाए बर संबंधित अधिकारी ल निर्देशित करिस। मुख्यमंत्री के निर्देश म जल्दी कार्यवाही करत जिला प्रशासन ह दूसरेच दिन राशन कार्ड बनाके हितग्राही ल दे देहे हे। ग्राम पंचायत शामतरा के वार्ड पंच ह श्रीमती अस्तला बाई कश्यप के घर जाके ओ ल राशन कार्ड सौंपिस। राशन कार्ड मिले म श्रीमती अस्तला कश्यप के चिंता दूर हो गए हे, अब ओ मन ल घलोक उचित मूल्य दुकान ले राशन के सुविधा मिलही। नवा राशन कार्ड मिले म श्रीमती अस्तला बाई ह मुख्यमंत्री श्री भूपेश बघेल के प्रति आभार व्यक्त करत ओ मन ल धन्यवाद देहे हें।