कोरबा, भारत सरकार अऊ छत्तीसगढ़ शासन कोति ले स्थापित “अटल डिजिटल सुविधा केन्द्र” ग्रामीण अंचल मन बर आशा के नवा आधार बनत हे। कोरबा जिला के ग्राम बेला म चालू होय ये केन्द्र गांव वाले मन ल शहर जाय के परेशानी ले मुक्त करके, समय, धन अऊ श्रम के बचत करावत हे। ए केन्द्र के माध्यम ले बैंकिंग सेवा, दस्तावेज़ सत्यापन, पेंशन, शासकीय योजना मन के लाभ, कार्ड निर्माण संग सबो काम गांव म ही होवत हे। महिला मन, बुजुर्ग अऊ युवा वर्ग ए सेवा के सहज रूप ले उपयोग करत हे।
ग्राम बेला के रहवइया धनीराम कंवर बतात हे के केन्द्र खुले ले अब पइसा निकाले या शासकीय योजना मन के लाभ लेहे बर बालको या आन शहर नइ जाना परत हे। उमन इही केन्द्र ले आयुष्मान भारत कार्ड घलोक बनवाए हें, जेखर से अब बड़े अस्पताल मन म निःशुल्क उपचार संभव होही। वोखर पत्नी, जेन महतारी वंदन योजना के हितग्राही हे, कहत हे के अब योजना के राशि सीधा केन्द्र ले मिल जाथे। एखर से समय अऊ पइसा के बचत होथे अऊ घर-परिवार के देखभाल घलोक आसानी ले हो जाथे।
अटल डिजिटल सुविधा केन्द्र के उद्देश्य गांव वाले मन ल शहर के बजाय गांव म ही सबो जरूरी सेवा उपलब्ध कराना हे। ये केन्द्र स्थानीय युवा मन ल रोजगार घलोक देवत हे। प्रशिक्षित ऑपरेटर मन के माध्यम ले सबो काम लउहे अऊ पारदर्शी ढंग ले करे जात हे। कोरबा जिला के ए केन्द्र मन ले पेंशनधारी मन ल समय म पेंशन मिलत हे, किसान मन ल प्रधानमंत्री किसान सम्मान निधि के राशि सीधा खाता म मिलत हे अऊ निकासी के काम गांव ले ही होवत हे। महिला मन ल महतारी वंदन योजना के राशि समय म मिलत हे। संगे गांव वाले मन के आयुष्मान भारत कार्ड, पैन कार्ड अऊ आन दस्तावेज़ घलोक इहें बनत हे। ग्राम बेला संग आसपास के गांव मन म अटल डिजिटल सुविधा केन्द्र ह मनखे मन के जीवन ल सरल बना देहे हे। ये केन्द्र गांव वाले मन ल तकनीकी रूप ले सशक्त करके आत्मनिर्भरता कोति आगू बढ़ावत हे।
अटल डिजिटल सुविधा केन्द्र बनिस ग्रामीण विकास के नवा आधार
