श्रीमती गायत्री निर्मलकर समेत गांव वाले मन ला गांवे मा मिलत हे बैंकिंग, डिजिटल अउ शासकीय सेवा मन के सुविधा
कबीरधाम, कभू बैंक के छोट-मोट काम खातिर घलो गांव के लोगन मन बर पूरा दिन ख्इता होवत रहिस। पइसा निकाले बर होय, जमा करे बर होय या कोनो सरकारी योजना के रासि पाए बर होय, एकर बर शहर तक जाना परत रहिस। अवइ-जवइ के खरचा अलग अउ बनी-भूति के नुकसान अलग। फेर अब ए ह बदलत हे। मुख्यमंत्री श्री विष्णुदेव साय के अगुवई मा छत्तीसगढ़ शासन डहर ले सुरू करे गए ‘अटल डिजिटल सुविधा केंद्र’ गांव वाले मन के जिनगी मा नवा सुविधा अउ नवा भरोसा लेके आए हे।
कबीरधाम जिला के ग्राम राजा नवागांव के रहइया श्रीमती गायत्री निर्मलकर के जिनगी मा घलो अटल डिजिटल सुविधा केंद्र ह बड़का बदलाव लाए हे। ओकर घरवाला श्री नोहर निर्मलकर मजूरी अउ कपड़ा प्रेस करे के काम करथे। परिवार के आय कम होए के सेती बैंक ले जुड़े काम बर शहर जाना ओकर बर उपराहा आर्थिक बोझ बन जात रहिस। कइ पइत तो बैंक जाए के सेती पूरा दिन के मजूरी घलो छूट जात रहिस। आज हाल पूरा बदल चुके हे। गांव मा चलत अटल डिजिटल सुविधा केंद्र के माध्यम ले श्रीमती गायत्री ह महतारी वंदन योजना के रासि ला सहज मा पा लेथे। जरूरत परे मा बैंक खाता मा पइसा जमा घलो कर देथे। कछु मिनट मा बैंकिंग सेवा मिले ले समय, पइसा अउ मेहनत तीनों के बचत होवत हे।
श्रीमती गायत्री ह हांसत-हांसत कहिथे के पहिली बैंक जाए मा पूरा दिन निकल जात रहिस। भाड़ा घलो लगत रहिस अउ मजूरी घलो छूट जात रहिस। अब गांव मा ही अटल डिजिटल सुविधा केंद्र ले महतारी वंदन योजना के पइसा मिल जाथे। ओ बताथे के सिरिफ ओकर परिवार ही न ही, भलुक पूरा गांव के सियान मन ला, माई-लोगन मन ला, किसान अउ मजदूर मन ला एकर लाभ मिलत हे। अब छोटे-छोटे बैंकिंग अउ डिजिटल सेवा मन बर शहर नइ जाना परय। सरकार के योजना मन के लाभ घलो समय मा मिल जाथे। आज अटल डिजिटल सुविधा केंद्र गांव मा सिरिफ बैंकिंग सेवा देवइया केंद्र नइ हे, भलुक ग्रामीण डिजिटल सशक्तिकरण के मजबूत आधार बन चुके हे। इहाँ आधार आधारित बैंकिंग, नगद निकासी अउ जमा, बिजली बिल भुगतान, मोबाइल अउ डीटीएच रिचार्ज, यात्रा टिकट बुकिंग, पैन कार्ड, आधार ले जुड़े सेवा मन समेत कइ डिजिटल सेवा उपलब्ध हे।