मजदूर मन के लइका मन ल मिलत हे बढि़या शिक्षा, सीएम विष्णु देव साय ह करिन छात्र मन के सम्मान

रायपुर, मुख्यमंत्री श्री विष्णु देव साय ह राजधानी रायपुर के पं. दीनदयाल उपाध्याय ऑडिटोरियम म आयोजित ‘अटल उत्कृष्ट शिक्षा योजना’ के सम्मान समारोह म सामिल होके प्रतिभावान लइका मन ल सम्मानित करिन। ए मौका म उन ह लइका मन के संग बइठ के मंझनिया के जेवन घलो करिन अउ अपन जिनगी के अनुभव साझा करत उमन ल बड़े सपना देखे अउ कड़ा मिहनत करे बर प्रेरित करिन।
समारोह के दउरान आने-आने श्रमिक कल्याण योजना मन के तहत 1 लाख 45 हजार 841 मजदूर मन के बैंक खाता म डीबीटी के माध्यम ले 39 करोड़ 67 लाख रुपिया ले जादा के सहायता राशि सीधा ट्रांसफर करे गीस।
मुख्यमंत्री ह बताइन के पाछू बछर 100 लइका मन ले सुरू होय ए योजना के दायरा बढ़ाके अब 200 कर देहे गे हे। प्रदेश के सबो 33 जिला मन ले चुने गे श्रमिक परिवार के होनहार लइका मन ल डीपीएस, राजकुमार कॉलेज अउ रुंगटा पब्लिक स्कूल जइसे नामी आवासीय स्कूल मन म कक्षा 6वीं ले 12वीं तक मुफ्त अउ गुणवत्तापूर्ण शिक्षा देहे जात हे।
कार्यक्रम म श्रम मंत्री श्री लखन लाल देवांगन ह बताइन के श्रम विभाग कोती ले 67 ठन कल्याणकारी योजना चलाए जात हे अउ बीते ढाई बछर म 774 करोड़ रुपिया ले जादा के सहायता राशि मजदूर मन ल बांटे गे हे। ए मउका म राजस्व मंत्री श्री टंकराम वर्मा, सांसद श्रीमती लक्ष्मी वर्मा अउ विधायक श्री पुरंदर मिश्रा घलो उपस्थित रहिन।