आत्मा योजना ले उन्नत खेती कोति परखर होइस रद्दा

राजनांदगांव, किसान मन ह अब आधुनिक तकनीक अपनाके उन्नत खेती करे के उदीम सरलग करत हें। कृषि विभाग के केन्द्र प्रवर्तित एग्रीकल्चर एक्सटेंशन रिफॉर्म्स (आत्मा) योजना ए दिशा म प्रभावी भूमिका निभावत हे। इही कड़ी म राजनांदगांव जिला के छुरिया विकासखण्ड के ग्राम अछोली अऊ चांदो के प्रगतिशील किसान श्री एकांत चंद्राकर अऊ श्री विवेक वैष्णव के उन्नत खेती के सपना साकार होय हे।
दुनों किसान मन ह टेलीविजन के माध्यम ले देश-विदेश, विशेषकर इजराइल जइसे देश म हाईटेक कृषि यंत्र ले होवत खेती ल देखके आधुनिक तकनीक अपनाए के इच्छा व्यक्त करे रहिन। नवम्बर 2025 म उमन कृषि विभाग ले संपर्क करिन। उप संचालक कृषि श्री टीकम सिंह ठाकुर के मार्गदर्शन म आत्मा योजना अंतर्गत ओ मन ल राज्य के बाहिर शैक्षणिक भ्रमण बर मध्यप्रदेश के इंदौर स्थित लाभगंगा एग्जीबिशन सेंटर म आयोजित फार्म-टेक इंडिया अंतर्राष्ट्रीय कृषि मेला म भेजे गीस, जेमां जिला के कुल 6 किसान मन ह सहभागिता करिन।
तीन दिन के मेला म मल्टीनेशनल कंपनी मन कोति ले प्रदर्शित नवा कृषि यंत्र के प्रत्यक्ष अवलोकन अऊ खांटी जानकार मन ले गोठ बात करके किसान मन के आत्मविश्वास बाढि़स। एकर पाछू किसान मन ह मशीन-बेड प्लांटर कम सीडर मशीन अऊ हैरो मशीन बिसा के मक्का, गेहूं अऊ सरसों के फसल मन के बोआई करिन। मशीन ले बोआई करे ले लागत म कमी, उचित दूरी म बीज-उर्वरक उपयोग अऊ खरपतवार नियंत्रण म लाभ मिलीस। किसान मन के कहना हे के आत्मा योजना के माध्यम ले परंपरागत खेती ले उन्नत खेती के न सिरिफ जानकारी मिलथे, बल्कि एला अपनाए के मार्ग घलोक प्रशस्त होथे।