रायपुर, 06 सितम्बर 2021। छत्तीसगढ़ के मुख्यमंत्री भूपेश बघेल ह स्वामी आत्मानंद के नाम ले संचालित शासकीय अंगरेजी माध्यम स्कूल जइसे अब हरेक जिला म एक-एक हिन्दी माध्यम उत्कृष्ट स्कूल खोले के घोषणा करे हे।
श्री बघेल ह शिक्षक दिवस के अवसर म काली राजधानी के आमापारा स्थित स्वामी आत्मानंद उत्कृष्ट विद्यालय योजना के अंतर्गत संचालित आर.डी.तिवारी शासकीय अंगरेजी माध्यम स्कूल के उन्नयन काम के लोकार्पण करत कहिन कि छत्तीसगढ़ के पहिचान शिक्षा, स्वास्थ्य अऊ रोजगार के क्षेत्र म होना चाही। उमन कहिन कि प्रदेश म महापुरूष मन के नाम ले संचालित होवइया स्कूल हमर पहिचान हे। ए ऐतिहासिक स्कूल मन के उन्नयन बहुउद्देशीय शाला के रूप म करे जाही।
उमन ये कार्यक्रम म कोरोना काल म लइका मन ल शिक्षा ले जोड़े रखे बर नवाचार करइया राज्य के 20 उत्कृष्ट शिक्षक मन ल सम्मानित तको करिन। उमन कोरोना काल म अपन माता-पिता ल गवां दे लइका मन ल महतारी दुलार योजना के अंतर्गत छात्रवृत्ति के चेक घलोक प्रदान करिन।
उमन कोरोना काल म शिक्षक मन कोति ले करे गे नवाचार के प्रशंसा करत कहिन कि आवश्यकता ही अविष्कार के जननी हे। कोरोना आपदा के अवसर म संकट म कइसे काम करे जा सकत हे, छत्तीसगढ़ के शिक्षक मन ह नइ केवल अदभूत काम करके देखाइन, भलुक ये घलोक साबित करिनकि ‘छत्तीसगढ़िया सबले बढ़िया‘ हे।
अंगरेजी माध्यम स्कूल जइसे अब हरेक जिला म खुलही हिन्दी माध्यम उत्कृष्ट शासकीय स्कूल- दाऊ भूपेश बघेल
