आत्महत्या रोकथाम म मीडिया के भूमिका विसय म कार्यशाला आयोजित
बेमेतरा, स्वास्थ्य विभाग कोति ले राष्ट्रीय मानसिक स्वास्थ्य कार्यक्रम के तहत् आज इहां जिला पंचायत सभाकक्ष म मीडिया प्रतिनिधि मन के कार्यशाला के आयोजन करे गीस। कार्यशाला आत्महत्या रोकथाम म मीडिया के भूमिका विसय म आयोजित रहिस। जिला पंचायत अध्यक्ष श्रीमती कविता साहू ह नवागन्तुक कलेक्टर के स्वागत करत अपन शुभकामना दीन। उमन आज के कार्यशाला के संबंध म जिला के स्वास्थ्य विभाग ल ए आयेाजन बर धन्यवाद दीन।
कार्यशाला ल संबोधित करत कलेक्टर श्रीमती शिखा राजपूत तिवारी ह कहिन कि मीडिया ल चौथा खंभा माने गए हे जेकर पहुंच सीधा जनता तक हे। आज के कार्यशाला के विसय बहुत ही चिंतन के विसय हे। छत्तीसगढ़ म आंकड़ा सराहनीय नइ हे। आज के युवा डिप्रेशन म आके ये घातक कदम उठावत हें जऊन चिन्ता के विसय हे। कलेक्टर ह स्कूल अऊ कॉलेज मन म एखर रोकथाम बर कार्यक्रम आयोजित करे के बात कहिन। उमन कार्यशाला म उपस्थित मीडिया के प्रतिनिधि मन ले आग्रह करिन, के ओ मन आत्महत्या के खबर मन ल अइसे प्रस्तुत करव कि समाज म आत्महत्या के तरीका के प्रचार झन होवय, कि मरइया ह कइसे आत्महत्या करे हे। संगेच ये घलोक उल्ले़ख करव कि आत्महत्या करे ले उंखर से जुड़े मनखे मन ल का का अउ कइसे दिक्कत मन के सामना करना परत हे। ये बेरा म सी.ई.ओ. प्रकाश कुमार सर्वे, मुख्य चिकित्सा स्वास्थ्य अधिकारी डॉ.एस.के शर्मा, सिविल सर्जन डॉ.एस.के पाल, उप पुलिस अधीक्षक एस.एस.शर्मा, सेंटर फार एडवोकेसी एण्ड रिसर्च नई दिल्ली के विषय-विशेषज्ञ सुश्री आरती धर, अनीस अऊ नदीम अहमद, सुष्मिता, डॉ.सुमी जैन छ.ग. ह मीडिया प्रतिनिधि मन ले विस्तार ले चर्चा करिन।
फाईल फोटो (ट्विटर)
