रायपुर, 11 जून 2020। राजकुमार कालेज के एसबीआई स्थित बैंक अकाउंट ले साढ़े 49 लाख रुपिया निकाले के कोशिश करे गे हे. अज्ञात ठग मन के द्वारा चेक के क्लोन तइयार कर ठगी के ये वारदात ल अंजाम दे के प्रयास करे गे रहिस. लेकिन बैंक अकाउंट म बैलेंस कम होय के सेती ले वो अपन मकसद म कामयाब नई हो पाइस. राजकुमार कॉलेज के ऑफिस अधीक्षक के रिपोर्ट म पुलिस ह अज्ञात आरोपी मन के खिलाफ अपराध दर्ज कर ले हे.
बताये जावत हे कि जोन चेक के क्लोन तइयार करे गे रहिस. वो स्कूल के एक शिक्षिका के नाम म 5 लाख 15 हजार के चेक जारी करे रहिस. जेखर भुगतान पूर्व म करे जा चुके रहिस. इही चेक के क्लोन बनाके अज्ञात आरोपी मन ह 49 लाख 50 हजार के चेक पश्चिम बंगाल के एक संस्था के नाम म एनआईटी स्थित एसबीआई म लगाये रहिस. लेकिन अकाउंट म बैलेंस कम होय के सेती ले चेक बाउंस होगे अउ अकाउंट ले चेक बाउंस होय के 177 रुपिया जब कटिस तब स्कूल प्रबंधन ल एखर जानकारी होइस. जेखर बाद पुलिस म मामला के शिकायत करे गिस.
