राजधानी म अब ऑटो चालक, सब्जी अऊ फल बेचइया मन के घलो होही कोरोना टेस्ट

रायपुर, 22 जून 2020। राजधानी रायपुर म अब ऑटो चालक, सब्जी अऊ फल बेचइया मन के घलो कोरोना जांच होही. ए जांच ल ले बर महिला बाल विकास विभाग के टीम ह घलो जाही. काबर कि कम्युनिटी स्प्रेड के घलो खतरा ह बाढ़ गे हे. एला कम करे बर स्वास्थ्य विभाग अऊ नगर निगम के टीम ह अब ऑटो, रिक्शा चालक मन के घलो कोविड-19 जांच करही. महिला अऊ बाल विकास विभाग के कार्यक्रम अधिकारी अशोक पाण्डे ह बताइस कि एखर बर प्लान तैयार करे गे हे. रायपुर के ट्रक ड्राइवर, सब्जी-फल विक्रेता, क्लिनिक कर्मी सहित आन दुकानदार मन के घलो रेंडम टेस्टिंग करे जाही. जिला प्रशासन के संग नगर निगम अऊ महिला बाल विकास विभाग के टीम ह डोर टू डोर सर्वे करही. ए फइसला ल राजधानी म सरलघ बाढ़त कोरोना के मामला ल देखत हुये ले गे हे.