रायपुर, मुख्यमंत्री श्री विष्णु देव साय ह काली मंत्रालय महानदी भवन म अवइया खरीफ सीजन ल देखत खाद अऊ बीज के उपलब्धता ल लेके उच्च स्तरीय समीक्षा बैठक करिन। मुख्यमंत्री श्री साय ह अधिकारी मन ल हुकुम देवत कहिन के प्रदेश म किसान मन ल सरलग खातू मिलय ए बात के ठउका करव।
मुख्यमंत्री ह विशेष रूप ले डीएपी के जगा म एनपीके खाद के उपयोग ल प्रोत्साहित करे के बात कहिन अऊ किसान मन ल एखर लाभ ले अवगत कराए ल कहिन। श्री साय ह कलेक्टर मन के माध्यम ले जिलावार सहकारी समिति मन म खाद के उपलब्धता अऊ वितरण के निगरानी अऊ सतत समीक्षा करे के निर्देश दीन।
मुख्यमंत्री श्री साय ह कहिन कि खेती-किसानी के ये समय किसान मन बर बहुत महत्वपूर्ण हे। कहूं ए समय खाद-बीज के आपूर्ति म कोनो प्रकार के बाधा आही, त एकर सीधा असर फसल के बुआई अऊ उत्पादन उपर परही। उमन अधिकारी मन ल निर्देश दीन के किसान मन ल समय म अऊ उचित दर म भरपूर मात्रा म खाद मिलना चाही। उमन कहिन के समिति मन म एनपीके खाद के व्यवस्था घलोक करे जात हे, किसान मन ल एला उपलब्ध कराए के दिशा म तुरंत कदम उठावव। उमन अमानक अऊ नकली खाद के बिक्री उपर गहिर चिंता व्यक्त करत निर्देश दीन के अइसन मामला म तुरंते सख्त कार्रवाई करे जाय।
बैठक म मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध कुमार सिंह, मुख्यमंत्री के सचिव श्री राहुल भगत, कृषि उत्पादन आयुक्त श्रीमती शहला निगार, संचालक कृषि श्री राहुल देव संग मार्कफेड के अधिकारी-कर्मचारी मौजूद रहिन।
प्रदेश म किसान मन ल मिलत रहय सरलग खातू : मुख्यमंत्री श्री साय
