अवैध, कच्ची अऊ मिलावटी शराब के बिक्री उपर होही सख्त कार्रवाई

रायपुर, छत्तीसगढ़ म अवैध अऊ कच्ची शराब के बिक्री के संगेच मिलावटी शराब बेचइया के खिलाफ सख्त कार्रवाई करे जाही, एखर बर आबकारी विभाग कोति ले सघन अभियान चलाए जाही। जानबा हे कि आबकारी मंत्री श्री कवासी लखमा ह अवैध शराब के बिक्री म सख्त कार्रवाई करे के निर्देश विभागीय अधिकारी मन ल देहे हें। ऊंखर निर्देश म आज आबकारी विभाग के सचिव श्री निरंजन दास ह विभागीय अधिकारी मन के बैठक लीन अऊ अइसन प्रकरण मन उपर सख्ती ले कार्रवाई करके रोक लगाय के निर्देश दीन। उमन कहिन कि ए काम मन म कहूं विभागीय अधिकारी-कर्मचारी मन के संलिप्तता पाए जाय म ऊंखर विरूद्ध घलोक सख्त कार्रवाई करे जाही।
आबकारी सचिव श्री दास ह अधिकारी मन के संग आबकारी विभाग के रेवेन्यु बढ़ाए के मुद्दा उपर घलोक चर्चा करिन। उमन कहिन कि देशी-विदेशी मदिरा दुकान मन ल कम्पोजिट करे जाए। अइसनहे मांग के मुताबिक ए दुकान मन म संबंधित ब्रांड के स्टॉक रखे जाय। मिलावटी शराब अऊ ओवररेटिंग के मामला के एफआईआर दर्ज कराए जाय। उमन कहिन कि देशी-विदेशी मदिरा दुकान मन म ओवररेट शराब बेंचात पाए जाय म संबंधित कर्मचारी के खिलाप बर्खास्तगी के कार्यवाही करे जाही। ए मामला मन के संरक्षण देवइया संबंधित अधिकारी मन उपर घलोक कड़ी कार्यवाही होही।
आबकारी सचिव श्री निरंजन दास ह कहिन कि आन राज्य ले अनाधिकृत रूप ले छत्तीसगढ़ म अवइया शराब म घलोक कड़ाई ले नियंत्रण रखे जाय। राज्य के सीमावर्ती जिला मन म एखर बर विशेष रूप ले निगरानी रखे जाय। उमन स्थानीय पुलिस अधिकारी मन ले समन्वय करके चेकपोस्ट के संख्या बढ़ाए के घलोक निर्देश दीन। उमन कहिन कि आन राज्य मन ले यात्री अऊ ट्रांसपोर्ट वाहन मन म लुकाके लाए जाने वाले शराब उपर घलोक निगरानी रखे जाय।
बैठक म आबकारी सचिव श्री दास ह बताइस कि अवैध, कच्ची अउ मिलावटी शराब म जहरीली मात्रा के परीक्षण बर लैबोरेटरी स्थापित कर लेहे गए हे। अवैध शराब के प्रकरण बनात समय शराब के लैबोरेटरी टेस्ट रिपोट लगाना ठउका करे जाए। बैठक म आबकारी विभाग के विशेष सचिव अउ छत्तीसगढ़ स्टेट मार्केटिंग कॉरपोरेशन लिमिटेड के प्रबंध संचालक श्री ए.पी. त्रिपाठी, अपर आयुक्त श्री आर.एस. ठाकुर, उपायुक्त श्री आशीष श्रीवास्तव, श्री पी.एस. साहू संग प्रदेश भर के जिला मन के अधिकारी उपस्थित रहिन।