देश बर आयुष कोविड-19 काउंसलिंग हेल्पलाइन होईस चालू: जड़ी-बूटी के मिलही सलाह

दिल्‍ली, 22 मई 2021। आयुष मंत्रालय ह आयुष कोविड-19 सामुदायिक सहायता हेल्पलाइन शुरू करे हे। एखर जरिये कोविड-19 के चुनौती के समाधान बर आयुष आधारित उपाय बताए जाही। एकर टोल-फ्री नंबर 14443 हे। ये हेल्पलाइन पूरा देश म शुरू हो गए हे अऊ हफ्ता के सातों दिन भिनसरहा छै बजे ले रतिहा बारा बजे तक खुले रइही।
हेल्पलाइन 14443 के जरिये आयुष के आयुर्वेद, होमियोपैथी, योग, प्राकृतिक चिकित्सा, यूनानी अऊ सिद्ध के विशेषज्ञ मन, मनखे मन के समस्या के समाधान करे बर उपलब्‍ध रइहीं। ये विशेषज्ञ मन रोगी के काउंसलिंग अऊ उपयोगी उपचार बताहीं अऊ नजदीकी आयुष केंद्र मन के जानकारी घलोक देहीं।
विशेषज्ञ मन कोविड-19 ले उबर गए रोगी मन ल दुबारा रोजमर्रा के काम शुरू करे अऊ अपन खुद के देखभाल करे के बारे म घलोक सलाह देहीं। ये हेल्पलाइन इंटरऐक्टिव वॉइस रेस्पांस (आईवीआर) आधारित हे अऊ हिन्दी अऊ अंगरेजी भाखा म उपलब्‍ध हे। एमा लउहे आन भाषा म घलोक जोड़ देहे जाही। हेल्पलाइन एक पईत म 100 कॉल्स लग सकत हे। जरूरत ल देखत एखर क्षमता ल तको बढ़ा देहे जाही। आयुष मंत्रालय ये हेल्पलाइन के जरिये उदीम करत हे के देशभर म कोविड-19 के फैलाव ल सीमित करे जाए। ये प्रयास म गैर-सरकारी संस्था प्रोजेक्ट स्टेप-वन सहयोग करत हे।