धमतरी, आयुष्मान भारत जन आरोग्य योजना अउ डॉ. खूबचंद बघेल स्वास्थ्य सहायता योजना के तहत जिला म अवइया 30 सितमबर तक छूटे हितग्राही मन के कार्ड बनाए जात हे। इही कड़ी म कलेक्टर श्री पी.एस. एल्मा के हुकुम म कलेक्ट्रेट कार्यालय परिसर म विशेष शिविर इतवार 26 सितमबर ले लगाए जात हे, जेखर से जिला के शत-प्रतिशत हितग्राही मन के आयुष्मान कार्ड बनाए म सुविधा होवय। आज इहां आयुष्मान कार्ड बनाए बर मनखे मन के तांता लगे रहिस। मनखे मन अपन राशन कार्ड, आधार कार्ड के संग इहां आयुष्मान कार्ड बनाए बर पहुंचत हें।
जानबा हे के इहां के अलावा ज़िला अस्पताल, सबो सामुदायिक स्वास्थ्य केंद्र, प्राथमिक स्वास्थ्य केंद्र, सबो 398 कॉमन सर्विस सेंटर्स, बाबू छोटेलाल श्रीवास्तव शासकीय स्नातकोत्तर महाविद्यालय अऊ 18 निजी अस्पताल म घलोक छूटे हितग्राही मन के आयुष्मान कार्ड बनाए जात हे। कलेक्ट्रेट परिसर म सितंबर के बचे दिन म भिनसरहा 9 ले रात 8 बजे तक ये शिविर लगाए जाही। आयुष्मान कार्ड बनाए ले शासन ह अधिकृत अस्पताल मन म इलाज बर बीपीएल परिवार ल पांच लाख अऊ ए.पी.एल. परिवार ल 50 हजार रुपिया तक के निःशुल्क चिकित्सा सुविधा मुहैय्या कराथे।
आयुष्मान कार्ड बनवाए बर 30 सितम्बर तक जिला कार्यालय परिसर म शिविर
