आयुष्मान भारत योजना के क्रियान्वयन म देश के अग्रणी राज्य मन म सामिल हे छत्तीसगढ़

रायपुर, छत्तीसगढ़ ह आयुष्मान भारत – प्रधानमंत्री जन आरोग्य योजना (एबी-पीएमजेएवाई) के सफल क्रियान्वयन म उल्लेखनीय प्रगति करत देश भर म उपचार देहे के मामला म चौथइया जगा पाए हे। ये सफलता राज्य सरकार के समावेशी अऊ सुलभ स्वास्थ्य सेवा उपलब्ध कराए के प्रतिबद्धता ल दर्शाथे, विशेषकर आर्थिक रूप ले कमजोर वर्ग मन बर।
राज्य सरकार ह एबी-पीएमजेएवाई ल छत्तीसगढ़ के अपन दू विशेष योजना — शहीद वीर नारायण सिंह आयुष्मान स्वास्थ्य योजना अऊ मुख्यमंत्री विशेष स्वास्थ्य सहायता योजना — के संग प्रभावी रूप ले समन्वित करे हे। एखर एकीकृत व्यवस्था ले सबसे अधिक लाभार्थी मन ल नगद रहित इलाज के सुविधा मिलत हे।
अब तक 78 लाख ले जादा लाभार्थी सार्वजनिक अऊ निजी अस्पताल मन म निःशुल्क इलाज के लाभ उठा डरे हें। सार्वजनिक अस्पताल मन म उपचार के संख्या म उल्लेखनीय बढ़ोतरी दर्ज करे गए हे, जेन सरकार के स्वास्थ्य ढांचा म जनता के बाढ़त विश्वास के संकेत हे।
वरिष्ठ नागरिक मन के स्वास्थ्य जरूरत मन ल ध्यान म रखत वय वंदन योजना ल घलोक राज्य म मजबूत करे गए हे। एखर तहत अब तक 4.5 लाख ले जादा वय वंदन कार्ड बनाए गए हे, जेखर से राज्य के 48% राशन कार्डधारी वृद्धजन लाभान्वित होए हें।
पंजीयन ल प्रोत्साहित करे बर आशा कार्यकर्ता, ग्राम सभा, शहरी स्वास्थ्य मंच, वृद्धाश्रम अऊ आवासीय कॉलोनी मन म लक्षित करके पहुंच ठउका करे गए हे। संगेच, 104 कॉल सेंटर के माध्यम ले सरलग संपर्क अऊ सेवा सुविधा देहे जात हे। विशेष प्रयास के तहत 6 जिला मन ल ‘वय मित्र जिला’ के रूप म चिह्नित करके राज्य सरकार वरिष्ठ नागरिक मन के स्वास्थ्य सुरक्षा ल अऊ जादा सुदृढ़ बनावत हे।