आयुष्मान कार्ड ले गयाराम के माड़ी के होइस सफल ऑपरेशन

बेमेतरा, 27 फरवरी 2024। आयुष्मान कार्ड ले गंभीर मरीज मन ल इलाज करवाए म बड़ सहायता मिलत हे। बेमेतरा जिला के 71 बछर के गयाराम साहू के माड़ी के सफल आपरेशन होय हे। वो ह बताइस कि अड़बड़ समय ले वोला माड़ी म पीरा के समस्या रहिस। आपरेशन के बाद पीरा ले मुक्ति मिल गए हे। वो ह बताइस कि पहिली कई चिकित्सक मन ले इलाज करवाइस अउ आयुर्वेद के दवइ लीस। फेर पीरा कम होए के नाम नइ लेवत रहिस। निजी अस्पताल म 2 ले 4 लाख रु. के खरचा बतावत रहिन। आर्थिक स्थिति ठीक नइ होए के सेती ओ ह इलाज कराए के स्थिति म नइ रहिस।
गया राम साहू ह बताइस कि ज़िला अस्पताल बेमेतरा म डॉक्टर मन ह बीमारी के बारे म जानकारी दीन अऊ चिकित्सा परीक्षण करे के बाद 22 फ़रवरी 2024 के डॉक्टर मन के टीम ह माड़ी ल बदल दीन। ऑपरेशन के बाद वाकर के सहारे चहल-कदमी कराए गीस। अब वो ह ठीक हे। रोजे व्यायाम अऊ नियमित दवई लेहे के सलाह वोला देहे गीस हे। ए बात म वो ह प्रधानमंत्री श्री नरेन्द्र मोदी अऊ मुख्यमंत्री श्री विष्णु देव साय ल धन्यवाद देहे हे।
आयुष्मान भारत प्रधानमंत्री जन आरोग्य योजना अंतर्गत निःशुल्क सफल ऑपरेशन आर्थो सर्जन डॉ. शिल्प वर्मा ह करीस। आयुष्मान कार्ड के तहत आर्थिक रूप ले कमजोर नागरिक मन ल 5 लाख रूपिया तक फोकट म इलाज के सुविधा प्रदान करे जाथे।