2 करोड़ 86 लाख रूपिया के निःशुल्क ईलाज के मिलीस लाभ
जशपुरनगर, कलेक्टर श्री रितेश कुमार अग्रवाल दिशा निर्देश म स्वास्थ्य विभाग कोति ले जिला के सबो विकासखंड म हितग्राही मन के प्राथमिकता ले आयुष्मान कार्ड बनाए जात हे। जिला म 01 अगस्त 2022 ले आप मन के द्वार आयुष्मान अभियान के तीसर चरण शुरू करे जात हे। ये दौरान 01 अगस्त ले 15 अकटूबर 2022 तक विशेष अभियान चलाके छूटे मनखे मन के आयुष्मान कार्ड बनाए जाही। जेखर तहत सबो ग्राम पंचायत स्तर संग स्कूल, थाना अउ आन सार्वजनिक स्थल म घलोक आयुष्मान कार्ड बनाए बर शिविर लगाए जाही। शिविर स्थल म हितग्राही मन ल लाय बर मितानीन अउ ग्राम पंचायत सचिव, आंगनबाड़ी कार्यकर्ता ल जिम्मेदारी देहे गए हे। संगेच स्वास्थ्य विभाग के कर्मचारी सरलग सहयोग करत कार्ड बनवाए के काम पूरा करवात हें।
मुख्यचिकित्सा अउ स्वास्थ्य अधिकारी ले मिले जानकारी के मुताबिक अभियान के तीसर चरण के शुरूआत के संग ही हितग्राही खुद पंजीयन करके कार्ड बना सकत हें। जिला म अब तक 63 प्रतिशत मनखे मन के आयुष्मान कार्ड बन गए हे। उमन बताइन कि आयुष्मान भारत प्रधानमंत्री जन आरोग्य योजना अउ डॉ. खूबचंद बघेल स्वास्थ्य सहायता योजनातंर्गत जशपुर जिला के 43 शासकीय चिकित्सालय अउ 2 निजी चिकित्सालय पंजीकृत हे। जनवरी 2022 ले अब तक करीबन 16534 हितग्राही ये योजना ले करीबन 12 करोड़ 86 लाख 22 हजार रूपिया तक के निःशुल्क ईलाज प्राप्त करे हें।
विश्व के सबले बड़े स्वास्थ्य योजना आयुष्मान भारत प्रधानमंत्री जन आरोग्य योजना डॉ. खूबचंद बघेल स्वास्थ्य सहायता योजना म जिला के 8,63,060 राशन कार्ड धारी हितग्राही मन म ले 5,46,007 मनखे मन के अभी हाल म आयुष्मान कार्ड जारी करे गए हे। समाजिक आर्थिक अउ जातीय जनगणना अउ राशन कार्ड धारी समस्त परिवार, योजना के लाभ लेहे बर पात्र परिवार के श्रेणी म सामिल हे। सीएमएचओ ह योजना के लाभ लेहे बर सबो मन ल आयुष्मान कार्ड बनवाए के आग्रह करे हें। संगेच जेन मनखे के अब तक आयुष्मान कार्ड नइ बने हे ओ मन अपन नजदीकी कॉमन सर्विस सेन्टर या सामुदायिक स्वास्थ्य केन्द्र, प्राथमिक स्वास्थ्य केन्द्र ले निःशुल्क अपन आयुष्मान कार्ड बनवा सकत हे।
आयुष्मान कार्ड योजना ले 16534 हितग्राही होइन लाभांवित
