वनांचल के गाँव मं स्वास्थ्य करमचारी मन घर-घर बनाके दीन आयुष्मान कार्ड
सुकमा, घर-घर जाके आयुष्मान कार्ड बनाये के बिसेस योजना के तहत सरकार अउ स्वास्थ्य विभाग के टीम मन पात्र परिवार मन के घर पहुँचत हे। एकर अलावा, मनखे मन खुदे घर बइठे Beneficiary Portal या मोबाइल ऐप के संग असानी ले अपन आयुष्मान कार्ड बना सकथंय।
छत्तीसगढ़ के सुकमा जिला के कोंटा विकासखंड के दूरिहा के वनांचल मं बसे गाँव कामापेदागुड़ा मं स्वास्थ्य विभाग के करमचारी मन जनसेवा के एक अऊ प्रेरक मिसाल पेस करिन। बिरबिट्ट अंधियारी, सरलग पानी के गिरई अउ बिजली नइ रहे जइसे कठिन हालत के बाद घलो स्वास्थ्य विभाग के टीम टॉर्च अउ मोबाइल के अंजोर के सहारे गाँव के घर-घर पहुँचिस अउ पात्र हितग्राही मन के आयुष्मान भारत अउ वय वंदन योजना के कार्ड बनाइन।
एके रात मं टीम ह 15 आयुष्मान कार्ड अउ 2 वय वंदन योजना के कार्ड तियार करिस। स्वास्थ्य करमचारी मन उही परिवार मन तक पहुँच के कार्ड बनाइन, जिनला इलाज के खरचा के चिंता बनेच दिन ले पदोवत रहिस। ए अभियान ह ए साबित कर दीस के सरकारी योजना मन के लाभ आखिरी मं बइठे मनखे तक पहुँचाए बर प्रशासन पूरा लगन अउ निष्ठा के संग काम करत हे।
संध्या पंडो ला मिलिस इलाज के भरोसा
आयुष्मान कार्ड पवइया हितग्राही संध्या पंडो ह कहिस के स्वास्थ्य विभाग के टीम रात मं ओकर घर पहुँचिस अउ ओकर आयुष्मान कार्ड बनाइस। अब ओला इलाज के खरचा के चिंता नइ रहय। ओ ह बताइस के ए कार्ड ओकर परिवार बर कठिन समय मं सुरक्छा अउ भरोसा के आधार बनही।
दूर-दराज के क्षेत्र मन तक पहुँचत हे योजना मन के लाभ
मुख्यमंत्री श्री विष्णुदेव साय के अगुवई मं राज्य सरकार के जनकल्याणकारी योजना मन के लाभ अब सुकमा जइसे दूर-दराज के क्षेत्र मन तक पहुँचत हे। जिला मं 2 लाख 51 हजार 722 पात्र हितग्राही मन के लक्ष्य के आगु अब तक 2 लाख 04 हजार 944 आयुष्मान कार्ड बन डरे गए हे। बाँचे 46 हजार 767 पात्र हितग्राही मन ला घलो झटकुन आयुष्मान योजना ले जोड़े बर बिसेस अभियान चलाए जात हे।
कामापेदागुड़ा के ए घटना बताथे के जब प्रशासन के मंशा मजबूत होवय अउ करमचारी मन पूरा निष्ठा ले काम करँय, त अंधियारी रात, मुसलाधार पानी अउ कठिन रस्ता घलो जनसेवा के काम ला नइ रोक सकय। स्वास्थ्य विभाग के ए पहल गाँव-घर के मनखे मन बर स्वास्थ्य सुरक्छा के नवा भरोसा बनके आगु आए हे।