स्वास्थ्य विभाग के नवा पहल ले सियान मन तक पहुंचिस आयुष्मान कवच
एमसीबी (MCB), जिला के आखिरी छोर तक स्वास्थ्य सुविधा पहुंचाए के संकल्प ला पूरा करत भरतपुर विकासखंड म स्वास्थ्य विभाग ह सेवा, समर्पण अउ संवेदनशील प्रशासन के बढ़िया मिसाल पेश करे हे। दुर्गम भौगोलिक स्थिति, पहाड़ी इलाका अउ कमजोर मोबाइल नेटवर्क जइसे चुनौती के बाद घलो स्वास्थ्य विभाग के टीम सियान मन के आयुष्मान वय वंदन कार्ड बनाए बर सरलग फील्ड म डटे हें।
अंदरूनी गांव मन म नेटवर्क के भारी समस्या ला देखत विभाग कोति ले नवा तरीका अपनाए गे हे। जिहां अच्छा मोबाइल नेटवर्क मिलत हे, उहां वरिष्ठ नागरिक मन ला सम्मान के संग पहुंचाए जात हे अउ मौका म ही ओ मन के वय वंदन कार्ड तैयार करे जात हे। ए मानवीय अउ व्यावहारिक पहल ले अब तक कतको सियान मन ला योजना के सीधा लाभ मिल चुके हे, जे मन पहली तकनीकी दिक्कत के सेती छूट जावत रहिन।
स्वास्थ्य कार्यकर्ता मन पूरा ईमानदारी अउ संवेदनशीलता के संग न केवल कार्ड बनाए के काम करत हें, बल्कि वरिष्ठ नागरिक मन ला योजना के फायदा के जानकारी दे के ओ मन ला जागरूक घलो करत हें।
आयुष्मान वय वंदन कार्ड 70 बच्छर या ओखर ले जादा उमर के वरिष्ठ नागरिक मन बर चलाए जावत एक महत्वपूर्ण योजना हरे, जेखर अंतर्गत पात्र हितग्राही मन ला पांच लाख रुपिया तक के मुफ्त इलाज उपलब्ध कराए जाथे।
ए योजना म पारिवारिक आय के कोनो बंधन नइ हे, जेखर ले हर पात्र सियान ला स्वास्थ्य सुरक्षा के भरोसा मिलत हे। मुख्य चिकित्सा अउ स्वास्थ्य अधिकारी डॉ. अविनाश खरे ह कहिन के विभाग के लक्ष्य हे के जिला के कोनो भी पात्र वरिष्ठ नागरिक ए योजना ले वंचित झन रहय। नेटवर्क के समस्या निश्चित रूप ले चुनौती भरे हे, फेर स्वास्थ्य विभाग के टीम पूरा लगन के संग फील्ड म काम करत हर सियान तक पहुंचत हे।