प्रदेश म शिक्षा अऊ स्वास्थ्य सुविधा मन ल अउ बने करे खातिर सरकार बांना उंचाए हे- मुख्यमंत्री श्री विष्णुदेव साय

रायपुर, मुख्यमंत्री श्री विष्णुदेव साय आज मंत्रालय महानदी भवन म छत्तीसगढ़ म शिक्षा अऊ स्वास्थ्य सुविधा मन के विस्तार के विसय म अजीम प्रेमजी फाउंडेशन के पदाधिकारी अऊ विभागीय अधिकारी मन के संग उच्‍च स्तरीय बैठक म सामिल होइन। मुख्यमंत्री श्री साय ह कहिन के प्रदेश म शिक्षा अऊ स्वास्थ्य सुविधा मन के उन्नयन बर सरकार प्रतिबद्ध हे। ए दिशा सरकार कोति ले सरलग उदीम करे जात हे। कॉरपोरेट सामाजिक उत्तरदायित्व के तहत निजी क्षेत्र के सहभागिता ले सरकार के काम मन ल बल मिलही। बैठक म राज्य म स्वास्थ्य सुविधा मन के विस्तार बर स्वास्थ्य विभाग अऊ अजीम प्रेमजी फाउंडेशन के बीच एमओयू होइस।
बैठक म मुख्यमंत्री श्री साय ल अजीम प्रेमजी फाउंडेशन के पदाधिकारी मन ह फाउंडेशन कोति ले छत्तीसगढ़ म शिक्षा, स्वास्थ्य, क्रेच(शिशुगृह),आजीविका विकास संग आन क्षेत्र मन म करे जात काम मन के विसय म पॉवरपॉइंट प्रेजेंटेशन ले विस्तार से जानकारी दीस। मुख्यमंत्री ल अजीम प्रेमजी फाउंडेशन के मुख्य कार्यकारी अधिकारी श्री अनुराग बेहार ह बताइस के फाउंडेशन कोति ले पाछू 15 बछर ले छत्तीसगढ़ म समाज सेवा के क्षेत्र म काम करे जात हे। अभी हाल म प्रदेश के 9 जिला मन म फाउंडेशन कोति ले कई ठन गतिविधि संचालित करे जात हे।
बैठक म मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध कुमार सिंह, पंचायत अऊ ग्रामीण विकास विभाग के प्रमुख सचिव श्रीमती निहारिका बारीक सिंह, मुख्यमंत्री के सचिव श्री राहुल भगत, स्कूल शिक्षा विभाग के सचिव श्री सिद्धार्थ कोमल परदेसी, सचिव स्वास्थ्य अऊ परिवार कल्याण विभाग श्री अमित कटारिया, सचिव उच्‍च शिक्षा विभाग डॉ एस भारतीदासन, सचिव महिला अऊ बाल विकास विभाग श्रीमती शम्मी आबिदी, अजीम प्रेमजी फाउंडेशन के स्टेट हेड श्री सुनील संग आन अधिकारी उपस्थित रहिन।