बीजापुर, 08 सितमबर 2020। कोविड-19 ल धियान म रखत पाछू 14 मार्च ले आंगनबाड़ी केन्द्र मन के संचालन बंद रखे गए हे अऊ आंगनबाड़ी कार्यकर्ता मन हितग्राही मन के घर जाके सूखा राशन प्रदाय करत हें। अभी हाल म विश्व स्वास्थ्य संगठन अऊ यूनीसेफ जइसे अंतर्राष्ट्रीय एजेंसी मन के कुपोषण के स्तर म कमी लाय के परामर्श अऊ सुझाव ल धियान म रखत राज्य शासन ह आंगनबाड़ी केन्द्र मन के माध्यम ले हितग्राही मन ल गरम पौष्टिक भोजन प्रदाय करे के निर्णय लेहे हे। ये निर्णय के मुताबिक जिला म लइका मन अऊ आन हितग्राही मन के पोषण स्तर बनाये रखे अऊ स्वास्थ्य सुविधा बर अभी हाल म आंगनबाड़ी केन्द्र मन के संचालन शुरू करे गए हे। ये बारे म जिला कार्यक्रम अधिकारी महिला अऊ बाल विकास श्री लुपेन्द्र महिनाग ह बताइस के कलेक्टर श्री रितेश कुमार अग्रवाल के मार्गदर्शन म जिला म कुपोषण अऊ एनीमिया के रोकथाम बर मुख्यमंत्री सुपोषण अभियान के अंतर्गत आंगनबाड़ी केन्द्र मन के माध्यम ले लाभान्वित होवइया हितग्राही मन ल गरम पौष्टिक भोजन देहे बर 7 सितमबर ले आंगनबाड़ी केन्द्र मन के संचालन शुरू करे गए हे। ये दौरान आंगनबाड़ी केन्द्र मन म आयोजित होवइया स्वास्थ्य अऊ पोषण दिवस के संचालन घलोक चालू करे गए हे।
अवइया बेरा म सबो आंगनबाड़ी केन्द्र खोले जाही, फेर कंटेनमेंट जोन म अवइया कोनो आंगनबाड़ी केन्द्र संचालित नइ होवय। उमन बताइन के आंगनबाड़ी केन्द्र मन ल चालू करे के पहिली सेनेटाईज करे गए हे। जऊन आंगनबाड़ी केन्द्र मन के 7 सितमबर ले संचालन शुरू करे गए, ये दौरान कोविड-19 के दिशा-निर्देश के अनुपालन करे गए हे अऊ वैश्विक महामारी कोविड ल दृष्टिगत रखत लइका मन अऊ महिला मन ल केला के पत्ता म गरम भोजन परोसे जात हे। जिला के दूरस्थ अंचल पामेड़ म घलोक 7 सितमबर ले आंगनबाड़ी केन्द्र मन के संचालन शुरू करके हितग्राही मन ल गरम पौष्टिक भोजन देहे गए हे। ये मौका म क्षेत्र के पंचायत पदाधिकारी, जिला कार्यक्रम अधिकारी श्री लुपेन्द्र महिनाग, आकांक्षी फेलो श्री समीर शौकीन अऊ महिला अऊ बाल विकास के मैदानी कर्मचारी मौजूद रहिन।