हर-हर महादेव ले गूंज उठिस भोरमदेव: मुख्यमंत्री श्री विष्णुदेव साय ह हेलीकॉप्टर ले फुल के बरसा करके हजारों कांवड़िया मन के करिन भव्य स्वागत

कबीरधाम, सावन महीना के तीसरइया सोमवार के छत्तीसगढ़ के प्राचीन, धार्मिक, ऐतिहासिक अऊ पुरातात्विक महत्व के तीर्थ स्थल बाबा भोरमदेव मंदिर म भक्ति अऊ श्रद्धा के गूंज ओ समय चरम म पहुँच गीस जब मुख्यमंत्री श्री विष्णुदेव साय ह हजारों कांवड़िया मन अऊ शिवभक्त मन उपर हेलीकॉप्टर ले फुल के बरा करके भव्य स्वागत अऊ अभिनंदन करिन। ए शुभ अवसर म विधानसभा अध्यक्ष डॉ. रमन सिंह, उपमुख्यमंत्रीद्वय श्री विजय शर्मा अऊ श्री अरुण साव उपस्थित रहिन।
ये सरलग दूसरइया साल ये जब मुख्यमंत्री खुद श्रद्धालु मन के स्वागत बर पुष्पवर्षा करत हें। पुष्पवर्षा के बाद मुख्यमंत्री श्री साय ह बाबा भोरमदेव मंदिर पहुंचके मंत्रोच्चारण, विशेष पूजा-अर्चना अऊ रुद्राभिषेक करिन अऊ प्रदेश के समृद्धि, शांति अऊ खुशहाली के कामना करिन।
मुख्यमंत्री श्री साय ह मंदिर परिसर म उपस्थित कांवड़िया मन अऊ श्रद्धालु मन ले भेंट करके उंखर हालचाल जानिन अऊ पूरा आत्मीय भाव ले अभिनंदन करिन। मुख्यमंत्री ह कहिन के आज सावन मास के तीसरइया सोमवार के बाबा भोरमदेव के पावन धरती म शिवभक्त मन के संग जुड़ना मोर बर बहुत सौभाग्य अऊ गरब के विसय हे। हजारों श्रद्धालु सैकड़ों किलोमीटर के पदयात्रा करके भगवान भोलेनाथ के दर्शन बर इहां पहुंचे हें—ये हमर आस्था, परंपरा अऊ सांस्कृतिक विरासत के जीवंत मिसाल हे।
ए बेरा म मुख्यमंत्री ह अमरकंटक ले 151 किलोमीटर पदयात्रा करके भोरमदेव मंदिर म जलाभिषेक करइया पंडरिया विधायक श्रीमती भावना बोहरा ल भगवा वस्त्र अऊ श्रीफल भेंट करके सम्मानित करिन।