पाछू बछर किसान मन ला मिले बढ़िया नतीजा ले होइस प्रेरित, कम खरचा म जादा पैदावार के भरोसा
मनेन्द्रगढ़-चिरमिरी-भरतपुर, आधुनिक अउ वैज्ञानिक खेती किसानी के तरीका ला बढ़ावा देहे खातिर किसान मन ला नैनो खातू के उपयोग बर सरलग पंदोली देहे जात हे। कृषि विभाग के प्रयास अउ किसान मन के अनुभव के असर अब गांव मन म घलो दिखे लगे हे। इही कड़ी म मनेन्द्रगढ़-चिरमिरी-भरतपुर जिला के खड़गवां विकासखंड के गाँव फुनगा के रहइया किसान बाबालाल ह ए खरीफ सीजन म पहली पइत अपन फसल म नैनो डीएपी के उपयोग करे के फैसला करे हवय।
किसान बाबालाल ह अपन खेती बर प्राथमिक कृषि साख सहकारी समिति पहुँच के नैनो डीएपी हासिल करिन। ओमन ह बताइन के खेती म आधुनिक तकनीक मन ला अपनाके किसान कम लागत म जादा अउ बढ़िया पैदावार के दिशा म आगू बढ़ सकत हवंय। इही उद्देश्य ले ओमन ह ए बछर अपन फसल म पहली पइत नैनो डीएपी के प्रयोग करे के फैसला करिन।
पाछू बछर किसान मन ला मिले नतीजा ले मिलिस प्रेरणा
बाबालाल ह बताइस के पाछू बछर ओकर गाँव अउ आसपास के कइ किसान मन नैनो डीएपी के उपयोग करे रहिन। उंकर खेत म फसल के बढ़त बढ़िया दिखे लगिस अउ पैदावार घलो बेहतर रहिस। आसपास के किसान मन के फसल म सकारात्मक नतीजा देखे के बाद ओकर बिस्वास नैनो डीएपी ऊपर बाढ़िस अउ ओ ह खुदे एला अपन खेती म आजमाए के निर्णय लेइस।
ओ ह कहिस, “मैं पहली पइत नैनो डीएपी के उपयोग करत हवंव। पउर साल हमर आसपास के किसान मन एकर उपयोग करे रहिन अउ ओमन ला बढ़िया नतीजा मिलिस। उंकर फसल ला देख के मोला घलो प्रेरणा मिलिस। उम्मीद हे के एकर उपयोग ले मोर फसल के बढ़त बढ़िया होही अउ पैदावार म घलो बढ़ोतरी होही।”
कम मात्रा म सुलभ परिवहन ले किसान मन ला सुविधा
किसान बाबालाल ह नैनो डीएपी के एक अउ फायदा के बारे म बतावत कहिस के एला एक जगा ले दूसर जगा ले जाना अड़बड़ आसान हे। पारंपरिक खातू मन के भारी-भरकम बोरा मन के तुलना म नैनो डीएपी के छोट कन बोतल ला आसानी ले झोला म रखे जा सकत हे। एकर से ढोए म सुविधा होथे अउ किसान मन के समय अउ मिहनत के बचत होथे। ओ ह आन किसान मन ले घलो आधुनिक खेती के तकनीक मन ला समझ के अपनाए के गोहार लगाइस। ओकर कहना हे के कहूं किसान वैज्ञानिक तरीका अउ नवा तकनीक मन के सही ढंग ले उपयोग करंय, त खेती ला जादा फायदा के सौदा बनाए के दिशा म बढ़िया नतीजा हासिल करे जा सकत हे।
वैज्ञानिक खेती बर किसान मन ला मिलत हे मार्गदर्शन
कृषि विभाग कोति ले जिला म किसान मन ला नैनो डीएपी समेत आधुनिक खेती तकनीक मन के उपयोग के संबंध म सरलग जानकारी अउ मार्गदर्शन देहे जात हे। किसान मन ला खातू मन के संतुलित अउ वैज्ञानिक उपयोग बर जागरूक करे जात हे, ताकि उत्पादन के लागत ला रोके के संग फसल के गुणवत्ता अउ पैदावार म सुधार करे के दिशा म प्रयास करे जा सकय। गाँव फुनगा के किसान बाबालाल के नैनो डीएपी अपनाए के फैसला ह जिला म बदलत खेती के सोच अउ आधुनिक तकनीक कोती किसान मन के बढ़त रुझान के मिसाल हे। खरीफ सीजन म एकर उपयोग ले मिलइला नतीजा मन ला लेके बाबालाल समेत आन किसान मन म घलो भारी उत्साह अउ उत्सुकता बने हवय।
