रायपुर, मुख्यमंत्री श्री भूपेश बघेल ले आज इहां मंत्रालय स्थित ऊंखर कार्यालय कक्ष म नारायणपुर जिला के बड़ेडोंगर के कई ठन मंदिर मन ले आए पुजारी मन के प्रतिनिधि मंडल ह विधायक श्री मनोज मंडावी के नेतृत्व म मुलाकात करिन। पुजारी मन ह मुख्यमंत्री ले दंतेवाड़ा अऊ जगदलपुर के मंदिर के पुजारी मन ल मिलइया मानदेय अऊ पूजा सामान बर राज्य शासन कोति ले देहे जात राशि के जइसे ही बड़ेडोंगर के कई ठन मंदिर मन के पुजारी मन ल घलोक मानदेय अऊ राशि देहे के आग्रह करिन। मुख्यमंत्री ह प्रतिनिधिमंडल के मांग मन उपर सहानुभूतिपूर्वक विचार करे के आश्वासन दीन।
श्री बघेल ह मुख्य सचिव ल बस्तर संग प्रदेश के आन जिला मन म आदिवासी मन के पूजा स्थल के पुजारी मन के संख्या के संबंध म जानकारी एक महिना म सकेले के निर्देश जारी करे हे। प्रतिनिधिमंडल म बड़ेडोंगर के दंतेश्वरी मंदिर के पुजारी श्री सोनू राम राना, माता मंदिर के पुजारी श्री भगवान सिंह राना, भंगाराम मंदिर के पुजारी श्री गिरधारी मांझी, बालाजी भगवान मंदिर के पुजारी श्री नारायण वैष्णव, रणबीर बाबा मंदिर के पुजारी श्री ओंकार सिंह राना, नरसिंहनाथ मंदिर के पुजारी श्री पवन सिंह कडि़याम अऊ श्री दिनेश नेताम, मलियारिन मंदिर के पुजारी श्री अशोक कुमार माली, भीमा मंदिर के पुजारी श्री सोनधर बघेल अऊ महादेव बाबा मंदिर के पुजारी श्री निरंजन दास वैष्णव सामिल रहिन।
