- महिला स्व सहायता समूह ह लगाए हे कई ठन किसिम के साग-भाजी
- शिवनाथ नदी के मिले हे उपहार
- जिला के सबले बड़े मॉडल गौठान अउ सबले बड़े वर्मी कम्पोस्ट
राजनांदगांव, 27 अप्रैल 2020। शिवनाथ नदी के करार म बसे गांव मोखला म बारहमासी पानी ले गांव म बढ़ोतरी के कहानी कहत हे। नदी के किनारे बने आदर्श गौठान म बने बाड़ी म जटादाह महिला स्व सहायता समूह के महिला मन ह किसिम-किसिम के भांटा, पताल, रमकेरिया, तूमा, गिल्की, चूरचुटिया, खीरा, मिरचा लगाये हें। ताइवान के खास प्रकार के अरन पपई के पेड़ म फूल लगे लगे हे, उहें करमता भाजी, खट्टा भाजी, चेचभाजी, कांदा भाजी घलोक लगे हे। सोलर पैनल ले सिंचाई होवत हे। गांव म कहूं जमीं म खुशहाली के हरियाली हे त कहूं धान के सोनहा बाली लहरावत हे। किसान इहां दू फसल लेवत हें उहें ये क्षेत्र म नदी के समवर्ती गांव भर्रेगांव, धामनसरा, जंगलेसर म साग भाजी बहुत होवत हे।
जटादाह स्व सहायता समूह के अध्यक्ष श्रीमती किरण साहू के बताती शासन के नरवा, गरवा, घुरवा अऊ बाड़ी योजना हमार बर बहुत अच्छा हे। येखर से साग-भाजी के खेती करे ले हमला रोजगार मिले हे। आमदनी बाढे ले लइका मन के परिवरिश म सुविधा होही अऊ ओ मन ल सुपोषण घलोक मिलही। वो ह बताईस के द्रव्यजीवमृत, धनाजमृत, वर्मी कम्पोस्ट अउ नाडेप खाद के उपयोग करके जैविक खेती करत हें। उमन कहिन के हम आत्मनिर्भर हन, ये बात के हमला अहसास हे अऊ एखर बर उमन तहे दिल ले मुख्यमंत्री श्री भूपेश बघेल ल धन्यवाद ज्ञापित करत हवन। समूह के श्रीमती संदीपा साहू ह कहिथे के बाड़ी योजना ले महिला मन म खुशी अऊ आत्मविश्वास बाढ़े हे। समूह के महिला श्रीमती वचनी साहू, श्रीमती महेतरीन बाई, श्रीमती अमरोतीन, श्रीमती राजकुमारी घलोक प्रसन्न हें।
मोखला म जिला के सबले बड़े मॉडल गौठान अउ सबले बड़े वर्मी कम्पोस्ट घलोक हे। इहां जय मां अम्बे स्व सहायता समूह अउ प्रगति स्व सहायता समूह के महिला मन वर्मी कम्पोस्ट निर्माण के काम करत हें। इहां 35 वर्मी बेड हे। अब तक 80 क्विंटल वर्मी कम्पोस्ट के बिक्री हो गए हे। सुराजी ग्राम योजना के तहत अम्बागढ़ चौकी के पीपरखार अउ डोंगरगढ़ विकासखंड के गांव मोतीपुर म घलोक आदर्श गौठान हे। जिहां महिला मन बाड़ी योजना ले लाभान्वित होवत हें।