बाड़ी विकास बनिस आमदनी के जरिया

सूरजपुर, राज्य सरकार के महत्वाकांक्षी योजना नरवा, गरुवा, घुरुवा बाड़ी योजना के तहत ग्राम पंचायत मन म गौठान विकसित करे जात हे। गौठान मन म मल्टी एक्टिविटी सेंटर के माध्यम ले बड़ संख्या म ग्रामीण महिला मन ल रोजगार मिलत हे। सूरजपुर जिला के जनपद पंचायत प्रतापपुर के ग्राम पंचायत खड़गवा कला गौठान म करमडांड़ महिला स्व सहायता समूह ह एक लाख 35 हजार रूपिया के आलू बेचे हें। गौठान म आलू खोदई के काम चलत हे एखर से महिला मन आर्थिक रूप ले मजबूत होवत हें, उहें सामाजिक रूप ले घलोक सुदृढ़ होए हें।
जानबा हे कि गौठान मन के माध्यम ले ग्रामीण महिला अऊ पशुपालक मन ल नियमित रूप ले रोजगार मिलत हे। एखर संगेच गोधन न्याय योजना के तहत गोबर बेचे ले धनार्जन तको होवत हे। महिला स्व-सहायता समूह के महिला मन ल वर्मी खाद निर्माण अऊ विक्रय ले रोजगार घलोक मिलत हे। गौठान मन म साग-सब्जी के खेती घलोक करे जात हे, जेन उंखर अकतहा आमदनी के जरिया बन गए हे।
ग्राम पंचायत खंडवा कला गौठान के करमडांड़ स्व-सहायता समूह के महिला मन ह बताइन कि गौठान म शासन के बाड़ी विकास योजना अंतर्गत कई बहुउद्देशीय काम करे जात हे जेमां उंखर आजीविका चलत हे। उमन बताइन के गौठान के बाड़ी ले 1 लाख 35 हजार रूपिया के आलू बेंचे गए हे अऊ करीबन एक एकड़ के आलू खुदाई करना अभी बांचे हे। अइसनहे गेंदा फूल ले 5 हजार रुपए के आमदनी होए हे त उहें अदरक ले 40 हजार रुपए के आमदनी होए हे जेमा अभी डेढ़ एकड़ के खुदाई अभी बांचे हे, मशरूम ले तको 25 हजार रुपए के आमदनी होए हे अऊ पालक भाजी ले 4 हजार रुपए के आमदनी होए हे।