छत्तीसगढ़ के मुख्यमंत्री ह बदलाव संस्था के कार्यक्रम म समाज के प्रतिभा मन ल करिस सम्मानित
रायपुर, छत्तीसगढ़ के मुख्यमंत्री श्री भूपेश बघेल ह कहिन कि कोनो समाज म बदलाव तभे सार्थक होथे, जब ओ समाज म बदलाव ल स्वीकार करे के सामरथ होवय। मुख्यमंत्री आज नई दिल्ली म बदलाव संस्था कोति ले आयोजित समाज के कई ठन क्षेत्र मन म सफलता हासिल करइया प्रतिभा मन के सम्मान समारोह ल संबोधित करत रहिन। ए अवसर म मुख्यमंत्री के पिता श्री नंदकुमार बघेल अऊ आन गणमान्य अतिथि घलोक उपस्थित रहिन।
मुख्यमंत्री ह कहिन कि साहित्य, संस्कृति अऊ समाज के क्षेत्र म जऊन काम करे जाथे, वो चिरस्थायी प्रकृति के होथे। ये काम दर्शाथे कि समाज म तत्कालीन समय म का घटित होवत हे अऊ ओखर समाज म कोन प्रकार के प्रभाव परत हे। उमन कहिन कि हमर समाज कर्मठ समाज हे अऊ हमेशा संघर्ष बर तत्पर रहिथे अऊ संघर्ष ले ही आगू बढ़े हे। उमन कहिन कि ए देश म होवत बदलाव अऊ ओला आगू बढ़ाए म युवा मन के महती भूमिका हे। छत्तीसगढ़ के गठन के बात करत मुख्यमंत्री ह श्री खूबचंद बघेल अऊ श्री चन्दूलाल चन्द्राकर संग सबो महापुरूष मन के योगदान ल सुरता करिन। उमन कहिन कि कहूं एकजुट होके कोनो प्रयास करे जाए त सफलता जरूर मिलथे।
श्री बघेल ह कहिन कि हमर समाज स्वाभिमानी समाज हे अऊ जब छत्तीसगढ़ म किसान के बेटा मुख्यमंत्री बनिस त ओ हर सबले पहिली जऊन निर्णय लीस वो किसान मनके ही हित म रहिस। उमन कहिन कि कृषि ले बड़े कोनो रोजगार आन सेक्टर नइ दे सकय। उमन कहिन कि अनाज के संगे संग हमला रोजगार के क्षेत्र म घलोक स्वालंबी बनना होही। उमन छत्तीसगढ़ के नरवा, गरूवा, घुरवा अऊ बाड़ी योजना के बारे म बतावत कहिन कि ग्रामीण अर्थव्यवस्था ल पुनर्जीवित करे बर जमीनी स्तर म एला क्रियान्वित करे जात हे। उमन सबो प्रतिभा मन ल बधाई अऊ शुभकामना देवत कहिन कि ओ मन ल समाज के उत्थान म अपन योगदान देना चाही ताकि दूसर मनखे घलोक उंखर अनुसरण कर सकयं।
