रायपुर 21 फरवरी 2020। राष्ट्रीय कृषि मेला म पशुधन विकास विभाग कोति ले विभागीय योजना मन के जानकारी पशुपालक मन ल उपलब्ध कराए अऊ विभागीय गतिविधि मन अऊ उपलब्धि मन के जानकारी आमजन ल उपलब्ध कराए बर विभागीय प्रदर्शनी के आयोजन करे जाही। राष्ट्रीय कृषि मेला 23 ले 25 फरवरी तक रायपुर के फल सब्जी मंडी प्रांगण तुलसी बाराडेरा म आयोजित करे जाही। मुख्यमंत्री श्री भूपेश बघेल 23 फरवरी के संझा 4 बजे राष्ट्रीय कृषि मेला 2020 के शुभारंभ करहीं। कार्यक्रम के अध्यक्षता कृषि अउर जल संसाधन मंत्री श्री रविन्द्र चौबे करहीं।
राष्ट्रीय कृषि मेला 2020 म बादशाह अउर करण नाम के दू भैंस सांड के प्रदर्शन करे जाही जऊन पशुधन विकास विभाग कोति ले कृत्रिम गर्भाधान के सफल प्रयास ले पैदा होए हें। बादशाह के मां मुर्रा नस्ल के भैंस रहिस जऊन करीबन 20 लीटर रोजेच दुग्ध उत्पादन करत रहिस। कृत्रिम गर्भाधान के फलस्वरूप 30 नवंबर 2014 के पैदा होए बादशाह के माध्यम ले उन्नत नस्ल के बहुत अकन पाड़ा अउर पड़िया के उत्पादन होय हे। करण के मां मुर्रा नस्ल के भैंस रहिस जऊन करीबन 18 लीटर रोजेच दुग्ध उत्पादन करत रहिस। बादशाह अऊ करण पशुपालन विभाग के मार्गदर्शन म टंडन डेयरी फॉर्म ग्राम सारागांव विकासखंड धरसीवा म कृत्रिम गर्भाधान के माध्यम ले विकसित करे गए हे। पाछू 50 बछर ले सरलग डेयरी के व्यवसाय म जुड़े टण्डन डेयरी फार्म म करीबन 1100 लीटर रोजेच दूध के उत्पादन होवत हे। डेयरी फार्म म अभी हाल म 175 पशु हे जेमा शंकर एचएफ साहिवाल, गिर अउर जर्सी के संगें-संग मुर्रा अउ मेहसाणा नस्ल के भैंस घलोक हवय।
