वन विभाग कोति ले चार मोटर सायकल अऊ 11 नग मोबाइल जप्त
रायपुर, वन मंत्री श्री मोहम्मद अकबर के दिशा निर्देशन अऊ प्रधान मुख्य वन संरक्षक श्री राकेश चतुर्वेदी अऊ प्रधान मुख्य वन संरक्षक (वन्य प्राणी) श्री अतुल कुमार शुक्ल के मार्गदर्शन म वन विभाग कोति ले वन्य प्राणी मन के अवैध शिकार अऊ व्यापार म कड़ी निगरानी रखे जात हे। इही तारतम्य म मुख्य वन संरक्षक श्री जनक राम नायक ह कांकेर वन मण्डल के अंतर्गत हाले म करे गए कार्यवाही के बारे म जानकारी दीन। जेमां उमन बताइन कि बाघ के खाल के तस्करी म लिप्त आठ आरोपी मन ल मौका म पकड़ ले गए हे। ये मां एक नग बाघ के खाल संग चार नग मोटर सायकल अऊ 11 नग मोबाइल वन विभाग के टीम कोति ले जप्त करे गए हे।
जानकारी मिले हे के वन विभाग के टीम ल पाछू 29 नवम्बर के खबर मिलीस के एक बाघ के खाल के सौदा बीजापुर म करे जात हे। एखर जानकारी मिलतेच वन विभाग के स्पेशल टीम एन्टी पोचिंग यूनिट अऊ डाग स्क्वाड अचानकमार टाइगर रिजर्व कोति ले जल्दी कार्यवाही करत बीजापुर के एक मनखे ले फोन ले सम्पर्क करके सौदा करे के प्रयास करे गीस। ओ मनखे ह कहिस कि मैं पैसा झरइया बाबा ल खोजत हंव। मुख्य वन संरक्षक श्री नायक ह बताइस कि वन विभाग कोति ले अपनेच एक कर्मचारी ल बाबा बनाके ओ कर तीर भेजे गीस।
ए प्रकार से एन्टी पोचिंग यूनिट अऊ डाग स्क्वाड अचानकमार टाइगर रिजर्व के दल नायक श्री संदीप सिंह के अगुवाई म स्निफर डाग सिम्बा अऊ नेरो के संग वन मण्डल कांकेर के टीम जिला कांकेर तहसील नरहरपुर के अंतर्गत ग्राम किसनपुरी के एक घर म घेरा बंदी करिन। दल ह मौका म एक नग बाघ के खाल संग चार नग मोटर सायकल अऊ 11 नग मोबाइल जप्त करिस। मुख्य वन संरक्षक श्री नायक ह बताइस कि बाघ के खाल ल पकड़े के कार्रवाई बर गठित टीम के संगें-संग कांकेर वन मण्डल के श्री सीयाराम सिंह, श्री आर. के. मण्डले अऊ श्री कैलाश सिंह ठाकुर आदि कर्मचारी मन के सक्रिय सहयोग रहिस।
