मुख्यमंत्री ह यूको बैंक के नवा शाखा के करिन शुभारंभ
40 स्व-सहायता समूह के महिला सदस्य मन ल प्रदान करे गीस चेक
रायपुर, मुख्यमंत्री श्री विष्णु देव साय ह आज कैम्प कार्यालय बगिया ले फरसाबहार विकास खंड के जोरण्डाझरिया ग्राम पंचायत अन्तर्गत ग्राम भेलवां म यूको बैंक के नवा शाखा के शुभारंभ करिन। ए बेरा म मुख्यमंत्री ह 40 स्व सहायता समूह के महिला सदस्य मन ल 24 लाख के चेक प्रदान करिन।
मुख्यमंत्री ह गांव वाले मन ल बैंकिंग सुविधा मिले म अपन शुभकामना दीन। ए मौका म उमन कहिन के वित्तीय समावेशन के दृष्टि ले ये कदम महत्वपूर्ण हे। एखर से फरसाबहार अऊ ओखर आसपास के गांव वाले मन ल बड़ लाभ मिलही। महिला मन ल आत्मनिर्भर बने म घलोक सहुलियत होही। स्थानीय निवासि मन ल बैंक ले जुड़े दैनिक काम मन बर अब अऊ जादा सुविधा मिल सकही।
मुख्यमंत्री श्री साय ह मुख्यमंत्री कैम्प कार्यालय बगिया म फरसाबहार विकास खंड के जोरण्डाझरिया के 4 स्व सहायता समूह के महिला मन ल 6-6 लाख के मान ले 40 महिला सदस्य मन ल रोजगार करे बर 24 लाख के चेक प्रदान करके शुभकामना दीन। जानबा हे कि मुख्यमंत्री के पहल म महिला मन ल रोजगार ले जोड़े बर बहुत अकन प्रयास करे जात हे। महिला मन सब्जी के खेती अऊ व्यापार के क्षेत्र म आगू बढ़त हें। ओ मन आचार पापड़, रेशम विभाग ले जुड़के कोसा काम अऊ आन रोजगार कर आत्मनिर्भर बनत हें।
