रोजगार गारंटी योजना ले घाट कटिंग करके बैगा आदिवासी मन ह बनाइन सुविधा वाला रद्दा

कवर्धा, 18 जून 2021। कथें के सड़क के निर्माण विकास के पहिया ल तेजी ले आगू बढ़ाथे जेन आसपास के क्षेत्र मन बर कोनो वरदान ले कम नइ होवय। विकास के मूलभूत सुविधा बर सबले जरूरी शर्त हे सतत आवागमन के सुविधा। मैदानी क्षेत्र मन म तो ये सुविधा आसानी ले उपलब्‍ध होथे फेर जब बात जंगल अऊ पहाड़ी क्षेत्र मन के आथे तो सड़क मन के महत्व अऊ जादा बाढ़ जाथे,
काबर के पहाड़ी क्षेत्र मन म निवास करइया मनखे आवागमन बर जंगल के सहारा लेत पथरीला अऊ टेड़गा-मेड़गा गड्ढा के संग जोखिम ले भरे पहाड़ मन के बीच ले आना-जाना करत रहिन, जेन ऊंखर बर बड़ कष्टदाई होथे। पहाड़ी क्षेत्र मन म निवास करइया बैगा बहुल गांव भेलकी अऊ अधचरा के निवासी मन बर घलोक पहाड़ के बीच ले घाट कटिंग करके सड़क बनाए के मांग बहुत महत्वपूर्ण रहिस जेन ल पूरा करिस महात्मा गांधी राष्ट्रीय ग्रामीण रोजगार गारंटी योजना ह।
बात होवत हे जिला के सुदूर वनांचल ग्राम भेलकी अऊ अधचरा के जेन विकासखंड पंडरिया के वनांचल गांव हे, जिहां विशेष पिछड़ी जनजाति बैगा आदिवासी निवासरत हे। वैश्विक महामारी कोरोना के लॉकडाउन म घाट कटिंग काम के संग भेलकी अऊ अधचरा के गांव वाले मन ल रोजगार के अवसर मिलीस अऊ संग म साकार होइस बरसों जुन्ना सपना। वित्तीय साल 2020-21 म इहां काम 18 लाख 17 हजार रुपए के लागत ले स्वीकृत होइस। ये काम म दू गांव के 140 परिवार ल बड़े मात्रा म रोजगार के अवसर मिले हे। लॉकडाउन के समय जिहां सब कुछ बंद रहिस अऊ गांव के बाहिर काम के कोनो साधन नइ रहिस तो ये विकट परिस्थिति मन म गांव वाले मन बर रोजगार गारंटी योजना ले घाट कटिंग के काम सहारा बनके उभरिस अऊ संग म मिलीस ए मन ल अपन घर आए जाय बर सुगमयुक्त सड़क बेहतर सुविधा के रूप म जिेमे कोनो गड्ढा पथरा झन होवय।