मुख्यमंत्री ह चिल्फी म बैगा मन के संग मनाइन नवा साल

रायपुर, मुख्यमंत्री श्री भूपेश बघेल नवा साल मनाए बर कबीरधाम जिला के बैगा अऊ आदिवासी बाहुल्य विकासखण्ड बोडला के ग्राम चिल्फी पहुंचिन। उमन विशेष पिछड़ी बैगा जनजाति परिवार अऊ आन मनखे मन ले आत्मीय भेंट-मुलाकात करके नवा साल के शुभकामना दीन। मुख्यमंत्री श्री भूपेश बघेल के संग प्रदेश के कृषि मंत्री श्री रविन्द्र चौबे घलोक पहुंचे रहिन। उमन चिल्फी म सबो के आत्मीय अभिनंदन करिन। एखर बाद मुख्यमंत्री श्री बघेल अऊ प्रदेश के कृषि मंत्री श्री चौबे प्रदेश के सुप्रसिद्ध पर्यटन स्थल सरोदादार पहुंचिन। उहां बिहान महिला स्व-सहायता समूह के बहिनी मन ह मुख्यमंत्री श्री बघेल अऊ कृषि मंत्री श्री चौबे के तिलक लगाके स्वागत करिन। विशेष पिछड़ी बैगा जनजाति के नर्तक दल मन ह अपन पारंपरिक वेश-भूषा म नृत्य करके मुख्यमंत्री के स्वागत अऊ अभिनंदन करिन।