- किसान मन के हित मन बर संकल्पित हे सरकार
- मुख्यमंत्री श्री भूपेश बघेल ह बटरेल म करिस कई ठन विकास काम मन के लोकार्पण-भूमिपूजन
दुर्ग, मुख्यमंत्री श्री भूपेश बघेल ह आज दुर्ग जिला के विकासखण्ड पाटन के ग्राम बटरेल म करीबन 20 करोड़ रूपिया के कई ठन विकास काम मन के भूमिपूजन अउ लोकार्पण करिन। मुख्यमंत्री ह ये बेरा म बटरेल म मनखे मन ल सम्बोधित करत कहिन कि किसान मन के हित मन बर सरकार संकल्पित हे। अभी किसान मन के धान 1815 अऊ 1835 रूपिया म खरीदे जात हे। बजट म प्रावधान करके योजना के तहत शेष राशि किसान मन ल हस्तांतरित करे जाही।
मुख्यमंत्री ह कहिन कि केंद्र सरकार ह बोनस देवइया राज्य मन ले धान खरीदी म प्रतिबंध लगा देहे गए हे। ये संबंध म केंद्र ले लगातार छत्तीसगढ़ के विशिष्ट स्थिति ल देखत अनुरोध करे गए हे कि हमला किसान मन ल 2500 रूपिया म धान खरीदे के अनुमति देवव। पंजाब अऊ हरियाणा म किसान तीन फसल लेथें। हमार इहां त किसान केवल एके फसल लेथे ए खातिर किसान मन ल धान के बनेच दाम मिलना चाही ताकि किसान पूरा संतुष्ट होवंय। उमन कहिन कि हम किसान मन के हित मन के रक्षा बर पूरा संकल्पित हन। योजना के तहत किसान मन के खाता म शेष राशि हस्तांतरित करबोन। श्री बघेल ह कहिन कि ओडिशा म कालियन अऊ तेलंगाना म रायतु योजना हे। इंकर माध्यम ले उहां किसान मन के हित के ध्यान रखे जात हे। छत्तीसगढ़ म घलोक अइसनहे योजना बनाके किसान मन ल शेष राशि हस्तांतरित करबोन। मुख्यमंत्री ह कहिन कि गौठान किसान मन के हे, ए मन ल जतका सहेजबोन, ये विकास बर वोतकेच बड़े माध्यम साबित होही। उमन किसान मन ले कहिन कि गोबर के माध्यम ले कम्पोस्ट खाद बनाव। जैविक खेती के अच्छा बाजार उपलब्ध हे, कहूं कोनो कारण ले बाजार के उपलब्धता नइ हो पात होही त सरकार एला क्रय करही। श्री बघेल ह गौठान के संचालन बर पैरा दान करे के अपील गांव वाले मन ले करे हें।
मुख्यमंत्री ह कहिन कि पाटन क्षेत्र म सिंचाई सुविधा मन के विस्तार बर सरकार संकल्पित हे। एखर बर बड़का योजना बनाए जाही। मुख्यमंत्री ह ये बेरा म बटरेल के स्वास्थ्य केंद्र के उन्नयन काम अउ जीर्णोद्धार काम के शुभारंभ करिन। संगेच 2 करोड़ 43 लाख के लागत ले बने झींट स्वास्थ्य केंद्र के लोकार्पण घलोक करिन। मोरिद अउ खुदमुदा स्वास्थ्य केंद्र मन के लोकार्पण के संगेच उमन रानीतराई, गाड़ाडीह अउ अचानकपुर केंद्र के भूमिपूजन घलोक करिन। गांव वाले मन के मांग म उमन स्कूल परिसर म बाउंड्री वॉल के घोषणा घलोक करिन। श्री बघेल ह ये बेरा म 300 दिव्यांगजन मन ल सामान अऊ लइका मन ल जाति प्रमाणपत्र के घलोक वितरण करिन।
