बलरामपुर-रामानुजगंज, हिम्मत अऊ हुनर ल आगू आए बर बेरा के अगोरा होथे। छत्तीसगढ़ के मेहनती महिला मन ल अइसनहेच बेरा देहे बर गौठान म मल्टीएक्टिविटी सेंटर बनाए गए हे। एखर से ओ मन आत्मनिर्भरता के नवा कहानी लिखत हें। इही मन म ले बलरामपुर-रामानुजगंज जिला के ग्राम बसन्तपुर के गौठान म संचालित सामुदायिक बाड़ी म काम करइया आकाश महिला स्व-सहायता समूह के सदस्य श्रीमती सोनमती कुशवाहा घलोक हे, जे ह मशरूम उत्पादन करके पाछू 3 बछर म 7 लाख रूपिया कमाए हे। एखर से ओकर न सिरिफ आत्मविश्वास बाढ़े हे, भलुक वो ह अपन परिवार के आर्थिक जरूरत मन ल पूरा करे म सक्षम हो गए हे।
जानबा हे कि मुख्यमंत्री श्री भूपेश बघेल के मंशा हमेशा महिला मन ल आर्थिक रूप ले सशक्त बनाए के रहे हे। एखर बर गौठान मन ल मल्टीएक्टिविटी सेंटर के रूप म विकसित करे जात हे। इहां महिला स्व-सहायता समूह के महिला मन ल आजीविका संवर्धन बर प्रशिक्षण दे के स्वावलंबन के रद्दा बताए जात हे।
इही कड़ी म बलरामपुर-रामानुजगंज जिला म महिला समूह मन ल उद्यान विभाग कोति ले प्रशिक्षण, मार्गदर्शन देके मशरूम उत्पादन बर सरलग प्रोत्साहित करे जात हे। विभाग कोति ले मशरूम के खेती बर जरूरी सामान जइसे- बीज, पॉलीथीन बैग्स, चाक पाउडर घलोक महिला मन ल देहे जात हे। एखर से बसन्तपुर गौठान के सामुदायिक बाड़ी म काम करत आकाश महिला स्व-सहायता समूह के महिला मन घलोक अब मशरूम के खेती, मधुमक्खी पालन अऊ कश्मीरी मिर्च के उत्पादन करके स्वावलंबी बनत हें।
सोनमती ह लिखिस आत्मनिर्भरता के नवा कहानी
