बलौदाबाजार जिला म ’खेत-खलिहान म श्री भूपेश बघेल के लोकवाणी के गूंज’

बलौदाबाजार, मुख्यमंत्री श्री भूपेश बघेल के मासिक रेडियो वार्ता लोकवाणी के गूंज ग्रामीण इलाका मन म खेत-खलिहान तक सुनाई दीस। खेती-किसानी के काम ले थोकुन समय निकाल के बलौदाबाजार तहसील के मगरचबा के किसान मन अऊ महिला मन ह खलिहान म बड़ दिलचस्पी के संग लोकवाणी सुनिन। लोकवाणी के ये पांचवा प्रसारण मुख्य रूप ले आदिवासी विकास उपर केंद्रित रहिस।
लोकवाणी सुने के बाद अपन प्रतिक्रिया म आदिवासी किसान विष्णु पैकरा ह कहिस कि मुख्यमंत्री श्री भूपेश बघेल उपर हमला पूरा भरोसा हे। पच्चीस सौ रूपिया म धान खरीदी के वादा ओ ह जरूर निभाही। गांव के ही आदिवासी युवा सुरेश पैकरा ह नेशनल ट्राइबल डांस फेस्टिवल आयोजन बर मुख्यमंत्री ल साधुवाद दीन। उमन कहिन कि राज्य निर्माण के 20 बरस म पहली पइत गांव ले लेके राजधानी तक आदिवासी फेस्टिवल के धूम मचत हे। एखर से आदिवासी संस्कृति स्वीकार्यता अऊ सम्मान बाढही। भागबत पैकरा ह शहीद बीर नारायण सिंह जयंती मनाए अऊ तेंदूपत्ता के खरीदी मूल्य 2500 ले 4 हजार प्रति मानक बोरा करे के सरकार के फैसला के सराहना करिस। रामप्रसाद कश्यप ह नवा औद्योगिक नीति म पिछड़े विकासखण्ड अऊ स्थानीय मनखे मन ल रोजगार दीए जाय के फैसला ल अच्छा बताइस।