मछरी पालन ले बालचंद के बदलीस तकदीर

गरियाबंद, जिला के विकासखंड़ फिंगेश्वर अंतर्गत ग्राम कुम्ही के किसान बालचंद साहू ह मछरी पालन करके अपन आर्थिक स्तर ल सुधारे म सफलता पाए हे। बालचंद पहिली अपन पुस्तैनी 18 एकड़ जमीन म धान फसल के पैदावारी लेत रहिस, जेमां लागत के मुताबिक आमदनी नइ होवत रहिस। अइसन स्थिति म बालचंद ह खेती के अलावा अकतहा आमदनी बर मछरी पालन के विकल्प चुनिस अऊ मछली पालन गतिविधि मन के अवलोकन करके एखर से प्रोत्साहित होके वो ह अपन 01 हेक्टेयर जमीन म तालाब के निर्माण करवाइस अऊ मत्स्य विभाग के अधिकारी मन के मार्गदर्शन म मछली पालन के काम चालू करिस।
वोकर बताती मत्स्य पालन विभाग कोति ले साल 2019.20 म राष्ट्रीय कृषि विकास योजना अंतर्गत, खुद के जमीन म अपन खर्चा ले 01 हेक्टेयर जलक्षेत्र निर्माण म योजनानुसार 40 प्रतिशत के दर ले अनुदान राशि 2.80 लाख रूपिया घलोक प्राप्त करिस। ये राशि ले वो ह मत्स्य पालन गतिविधि मन के विस्तार करिस अऊ सालभर के भीतर ही अकटूबर 2020 म वो ह 50 टन मत्स्य उत्पादन कर बाजार म बिक्री करके अच्छा आमदनी अर्जित करिस, जेखर से प्रोत्साहित होके वो ह खुद के कृषि जमीन म 01 हेक्टेयर के अऊ तालाब बनवाइस। संगेच तालाब के मेढ़ मन म उद्यानिकी अउ दलहन फसल अऊ कटहल, पपीता, नीबू पौधा रोपित करके अकतहा आमदनी के जरिया बनाइस। मछली पालन ले बालचंद साहू आर्थिक रूप ले सुदृढ़ होइस, संगेच वोखर मत्स्य पालन काम म संलग्न 05 मजदूर मन ल रोजगार तको मिलीस अऊ आसपास के फुटकर मछली बेचइया रोजाना 25 ले 50 किग्रा मछली खरीदके गांव मन म विक्रय करके आमदनी अलगे कमावत हें। बालचंद मत्स्य पालन व्यवसाय ले अब सफल मछली पालक के रूप म जाने जाथे। अब ओ हैचरी निर्माण के योजना बनावत हे।