आदर्श गौठान ‘‘चरोटा‘‘ म मोहावत हें गरूवा
बालोद, बालोद जिला म राज्य शासन के महत्वाकांक्षी नरवा, गरूवा, घुरवा अऊ बारी के संरक्षण, संवर्धन काम अब परगट दिखे लगे हे। जिला मुख्यालय ले लगभग पॉच किलोमीटर दूर ग्राम पंचायत उमरादाह के आश्रित ग्राम चरोटा के आदर्श गौठान म गौवंशीय पशुधन लोभा के रोजेच पहुंचत हें। पशुधन इहॉ गॉव ले निकलके दरदोरा नरवा के पारे-पार गौठान पहुंचत हें। यहॉ पेड़ के तरी किसान मन कोति ले देहे गए पैरा खाके अऊ स्वच्छ पानी पीके गौठान म बिलम के घर चल देवत हें।
कलेक्टर श्रीमती रानू साहू के मार्गदर्शन म ग्राम चरोटा म ढाई एकड़ के जुन्ना गौठान ल ‘‘गरूवा‘‘ कार्यक्रम के तहत नवा रूप म विकसित करे जात हे। इहॉ बनाय गए गौठान म बड़ संख्या म गॉव के गौवंशीय पशु पहुंचत हें। गौठान म पशु मन बर चारा, पानी, छइंहा के व्यवस्था अऊ चारों तरफ फेंसिंग करे गए हे। कृषि विभाग कोति ले पशु मन के गोबर अऊ चारा के अवशेष ले वर्मी कम्पोस्ट खाद तियार करे बर वर्मी कम्पोस्ट बेड बनाय गए हे। पशु मन बर स्वच्छ पेयजल बर ट्यूबवेल स्थापित करे गए हे। पशु मन के टीकाकरण अउ नस्ल सुधार अऊ आन स्वास्थ्यगत देखभाल पशु चिकित्सा विभाग कोति ले करे जाही। इहॉ चारागाह विकास बर काम करे जात हे। उद्यानिकी विभाग कोति ले बारी विकास के काम करे जात हे। गौठान के तिर म बोहइया दरदोरा नाला म ‘‘नरवा‘‘ कार्यक्रम के अंतर्गत साफ-सफाई अऊ तटबंध निर्माण के काम कराये गए हे।
ग्राम चरोटा के पशु मन ल चरइया चरवाहा श्री उदला यादव ह मगन होके बताइस के आदर्श गौठान के बने ले सबो पशु रोजेच गौठान म आवत हें। इहॉ पैरा खाथें, स्वच्छ पानी पीथें अऊ गौठान म विचरण करथें।
