किसान मन ले चर्चा करके खेती किसानी के तैयारी के लीन जानकारी
बालोद, 06 जुलाई 2020। महिला अउ बाल विकास अऊ समाज कल्याण मंत्री श्रीमती अनिला भेंड़िया ह बालोद जिला के डौण्डीलोहारा विकासखण्ड के गांव मन के दौरा करके कई ठन विकास काम मन के भूमिपूजन करिन। ये बेरा म उमन किसान मन ले चर्चा करके खेती किसानी के तैयारी के जानकारी लीन अऊ नोवेल कोरोना वायरस के संक्रमण ले बचाव बर गांव वाले मन ल मास्क वितरण करिन।
विकास काम मन के भूमिपूजन म ग्राम परसाडीह(ज) म शासकीय पूर्व माध्यमिक शाला म अहाता निर्माण, सहकारी समिति भवन के आगू सीमेंटीकरण, ग्राम अछोली म शासकीय हाईस्कूल म अहाता निर्माण,सामुदायिक भवन निर्माण, ग्राम चिखली म सामुदायिक भवन निर्माण, ग्राम कोड़ेकसा म शासकीय हाईस्कूल म अहाता निर्माण, ग्राम खड़बत्तर म शासकीय प्राथमिक शाला म अकतहा कक्ष निर्माण अऊ ग्राम गोटीटोला म सामुदायिक भवन निर्माण काम सामिल हे।
मंत्री श्रीमती भेंडिया ह किसान मन ले धान बुवाई के प्रगति, खाद-बीज संग आन चीज मन के उपलब्धता के जानकारी लीन। किसान मन ह बताइन के खाद-बीज के कोनो समस्या नइ हे। श्रीमती भेंडिया ह किसान मन ले कहिन के सरकार के जनकल्याणकारी योजना मन के जादा ले जादा लाभ उठावव। छत्तीसगढ़ सरकार कोति ले किसान मन ल अरहर बीज मिनीकिट उपलब्ध कराए जात हे, अपन खेत मन के मेड़ म अरहर (राहेर) लगावव। उमन किसान मन ल कोदो, कुटकी अऊ मक्का के फसल लेहे के संग वृक्षारोपण बर घलोक प्रेरित करिन। श्रीमती भेंड़िया ह किसान मन ले कहिन के नामांतरण, सीमांकन अऊ राजस्व संबंधी लंबित प्रकरण मन ले अवगत करावव। किसान मन के समस्या मन के जल्दी निराकरण करे के हर संभव प्रयास करे जाही। ये बेरा म जनप्रतिनिधि, गणमान्य नागरिक मन संग जिलास्तरीय अधिकारी, कर्मचारी मौजूद रहिन।
