कई ठन ग्राम पंचायत म करे गीस ‘समाधान तुंहर दुआर’ शिविर के आयोजन

बालोद, जिला के कई ठन ग्राम पंचायत मन म आयोजित समाधान तुंहर दुआर शिविर गांव वाले मन बर सौगात भरे रहिस। शिविर म उपस्थित कई ठन विभाग मन के अधिकारी मन कोति ले गांव वाले मन के आवेदन पत्र के परीक्षण करके मौका म बहुत अकन समस्या मन के निराकरण करे गीस, जेखर से गांव वाले मन म खुसी देखे गीस। एखर अंतर्गत बालोद विकासखण्ड के ग्राम पंचायत अंगारी, जामगांव बी, कन्नेवाड़ा, अर्जुंदा तहसील के ग्राम पंचायत चैरेल, तिलखैरी, गुण्डरदेही विकासखण्ड के ग्राम पंचायत गोरकापार, जरवाय, चिचबोड़, डौण्डी विकासखण्ड के ग्राम पंचायत आमाडुला, मथेना, ढोर्रीठेमा, गुरूर विकासखण्ड के ग्राम पंचायत उसरवारा, कनेरी, कुलिया अऊ मार्री बंगला तहसील के अछोली, परसाडीह, गारका म आयोजित शिविर म अपन मांग अउ समस्या मन ल लेके बड़ संख्या म ग्रामीण पहुंचे रहिन। ये बेरा म संबंधित विभाग के अधिकारी-कर्मचारी मन कोति ले मिले आवेदन मन के परीक्षण करके पात्रतानुसार मौका म ही हितग्राही मन के नवा राशन कार्ड बनाए के संग राशन कार्ड म नाम जोड़े गीस। एखर अलावा बी-1 नकल, बीज मिनीकिट, किसान पुस्तिका आदि के वितरण करे गीस। ग्राम पंचायत मन म आयोजित शिविर मन म संबंधित हल्का पटवारी, ग्राम पंचायत के सचिव, ग्रामीण कृषि विस्तार अधिकारी संग आन संबंधित अधिकारी कर्मचारी उपस्थित रहिन।