बलौदा बाजार स्पंज आयरन फैक्ट्री हादसा म मुख्यमंत्री श्री विष्णु देव साय ह जतइन गहिर दुख

बलौदा बाजार, जिला के बकुलाही म स्थित स्पंज आयरन फैक्ट्री म होय भयंकर विस्फोट के घटना ल मुख्यमंत्री श्री विष्णु देव साय ह भारी दुखद अउ हिरदय ल झकझोर देवइया बताय हें। ए दर्दनाक हादसा म 6 झन मजदूर मन के असमय मउत हो गे, जब के 5 झन मजदूर गंभीर रूप ले घायल होय हे, जे मन ल बने अउ बड़े अस्पताल म इलाज बर बिलासपुर रिफर करे गे हे।
मुख्यमंत्री श्री साय ह ए दुर्घटना म अपन जान गंवाये मजदूर मन के परिवार वाले मन के प्रति गहिर सोक संवेदना परगट करत कहिन के राज्य सरकार ए कठिन बेरा म पीड़ित परिवार मन के संग पूरा संवेदनशीलता अउ मजबूती ले खड़े हे। उमन भरोसा देवाइन के सोक म डूबे परिवार मन ल सबो किसम के संभव मदद देहे जाही।
मुख्यमंत्री श्री साय ह जिला प्रशासन ल निर्देश दे हे के घायल मन के इलाज म कोनो परकार के कमी झन होवय अउ उमन ल सबले बढ़िया डॉक्टरी सुविधा मिलय। एकरे संग, हादसा के कारन के सही-सही जांच करे के घलोक साफ निर्देश देहे गे हे, ताकि आघू चलके अइसने घटना दोबारा झन घटय।
मुख्यमंत्री श्री साय ह कहिन के मजदूर मन के सुरक्षा राज्य सरकार के सबले बड़े प्राथमिकता हे अउ कारखाना मन म सुरक्षा नियम मन के पालन ल लेके कोनो भी परकार के लापरवाही बर्दास्त नइ करे जाय।