आवेदन मन के जांच करके समय सीमा म निराकृत करे बर दीन हुकुम, कुल 28 आवेदन मिलिस
बलौदाबाजार, 30 जुलाई 2024। जिला कार्यालय म आयोजित कलेक्टर जनदर्शन म आज कलेक्टर श्री दीपक सोनी ह आम मनखे मन के समस्या, शिकायत ल गंभीरता ले सुनके अधिकारी मन ल निराकरण करे बर निर्देशित करिन। जन चौपाल म आज अलग-अलग समस्या के निराकरण बर कुल 28 आवेदन मिलिस। कलेक्टर ह प्रकरण के मुताबिक संबंधित अधिकारी मन ल आवेदन प्रेषित करत लउहे नियमानुसार निराकरण के निर्देश देहे हें। एखर संगेच उमन महत्वपूर्ण प्रकरण मन ल समय सीमा म दर्ज करके जरूरी कार्यवाही संबंधित अधिकारी ल प्रेषित करिन। ए बेरा म सीईओ जिला पंचायत सुश्री दिव्या अग्रवाल, अपर कलेक्टर सुश्री दीप्ती गौते, प्रशिक्षु आईएफएस अक्षय दिनकर भोसले संग सबो एसडीएम, तहसीलदार, जनपद सीईओ अउ कई विभाग मन क़े जिलाधिकारी गण उपस्थित रहिन।
जनदर्शन म ग्राम सूरजपुरा के ग्रामीण मन रकबा नंबर 460 घास जमीन ल खेल मैदान बर आरक्षित करे के संबध म आवेदन प्रस्तुत करिन। कलेक्टर तहसीलदार भाटापारा ल निर्देशित करत समय सीमा म प्रकरण ल निराकृत करे ल कहिन। अइसनहे पंचायत संडी के गांव वाले मन ह ग्राम पंचायत देवतराई ले अलग करके नवीन पंचायत गठन बर आवेदन करिन एमा कलेक्टर ह उप संचालक पंचायत ल निरीक्षण करके जांच प्रतिवेदन प्रस्तुत करे ल कहिन। एखर अलावा जनदर्शन म स्वास्थ्य उपचार, नवा राशन कार्ड निर्माण, रोजगार के मांग, सड़क नाली निर्माण, अतिक्रमण हटाए, मुआवजा देवाए, सीमांकन कराए जइसे आन आवेदन तको प्राप्त होइस। कलेक्टर दीपक सोनी ह सबो आवेदन मन ल संबंधित अधिकारी मन ल प्रेषित करके आवेदन मन के परीक्षण करके शासन के नियमानुसार समय सीमा म कार्रवाई सुनिश्चित करे के निर्देश दीन।
