बलौदाबाजार, 9 मई 2020। जिला कलेक्टर कार्तिकेय गोयल के जबर उदीम ले जिला के 86 प्राथमिक सेवा सहकारी समिति मन म बीज अउ खातू के भरपूर मात्रा म भंडारण करे गए हे। जिला के किसान भई मन सोसायटी म जाके जतका चाहंय वोतका बीज अउ खातू पा सकत हें। किसान मन के खातू उठात बेरा कोरोना वायरस ले संबधित सोशल डिस्टेंसिंग के नियम के घलोक पालन करे जात हे।
उपसंचालक कृषि विष्णु प्रसाद चौबे ह बताइस के अभी तक जिला म यूरिया के 8633 टन, पोटाश 1443 टन, एनपीके 49 टन, एस एस पी 2688 टन,डीएपी 5437 टन एकर जइसे कुल 18 हज़ार 250 टन खातू भंडारण हे। अइसनहे बीज म स्वर्णा, राजेश्वरी, महामाया, स्वर्णा 1 आदि धान के कुल 32 हज़ार 550 क्विंटल भंडारित हे। जऊन किसान ल सहकारी समिति मन के माध्यम ले शून्य ब्याज दर म 30 मई तक उपलब्ध कराए गए हे।
शासन स्तर म बीज अउ खात मन के मूल्य निरधारित करे गए हे। जेखर मुताबिक मोटा धान 2250 रुपया प्रति क्विंटल, 25 सौ पतला धान, 29 सौ सुगन्धित धान अउ यूरिया 266 रुपया 50 पैसा बोरा, डीएपी 11सौ50 रुपया बोरा, पोटाश 9 सौ 18 रुपया 75 पैसा बोरा, एसएसपी पाउडर 3 सौ 40 ले 3 सौ 70 रुपया बोरा निरधारित हे।
जिला के कोनो किसान ल बीज अउ खातू के उठाव के सम्बंध म कोई शिकायत होही त उमन जिला कृषि हेल्पलाइन नंबर 07727-222054 म या अपन नजदीकी ग्रामीण कृषि विस्तार अधिकारी ले सम्पर्क कर सकत हें। जिला कलेक्टर ह सबो किसान मन ले अपील करे हें के किसान अकतहा आय बर खेत मन के मेड़ म अरहर के बीज अवश्य लागावंय। किसान मन ल 2 किलोग्राम प्रति हेक्टेयर के हिसाब से राहेर बीज उपलब्ध कराए जाही। ये संबंध म नजदीकी ग्रामीण कृषि विस्तार अधिकारी तीर अपन माँग पहिलीच ले दर्ज करा देवव।
