बलौदाबाजार, जिला अऊ सत्र न्यायाधीश श्री एस.के.शर्मा अऊ कलेक्टर श्री कार्तिकेया गोयल ह आज बिहनिया इहां जिला कार्यालय परिसर ले हरियाली प्रसार योजना के अंतर्गत चलित वाहन ल हरियर झण्डी दिखाईन। वन विभाग के ये योजना के अंतर्गत फोन करके मनचाहे पौधा के मांग करे म ऊंखर घर तक पहुंचके पौधा निःशुल्क प्रदाय करे जाही।
अभियान के समय मुख्य रूप ले अपन मकान अऊ एखर से सटे बाड़ी म लगाये बर फलदार अऊ छायादार पौधा वितरित करे जाही। पहिली दिन आज करीबन 300 पौधा योजना के अंतर्गत घर पहुंचके बांटे गीस।
मुख्य अतिथि के रूप म मौजूद जिला न्यायाधीश श्री शर्मा ह घर पहुंचके पौधा देहे के वन विभाग के योजना के सराहना करिन। उमन कहिन कि धरती के तपन ल थामे अऊ जल स्तर ल बनाये रखे बर जादा ले जादा पौधा लगाये के जरूरत हे।
कलेक्टर श्री गोयल ह कहिन कि आज हरेक मनखे पेड़ लगाना तो चाहत हें, फेर इंकर उपलब्धता के जानकारी ओ मन ल नइ हो पात रहिस। एखर निदान के तौर म वन विभाग कोति ले ये योजना लाए गए हे। दूरभाष ले अपन पता अऊ पौधा के प्रजाति दर्ज कराए म दू-तीन दिन म ओ मन ल उंखर पसंद के पौध देहे जाही।
डीएफओ श्री विश्वेश कुमार ह बताइस कि योजना के अंतर्गत मनखे मन ल निःशुल्क पौधा दीए जाही। फिलहाल उंखर नर्सरी म आंवला, अमरूद, नीबू, जामुन, नीम, शीशु, पीपल, बरगद, मुनगा अऊ पेल्टाफार्म के पौधा उपलब्ध हे। अइसनहे साप्ताहिक जनदर्शन म घलोक करीबन एक हजार गांव वाले मन ल पौधा बांटे गए हे। डीएफओ ह बताइस कि पेड़ लगाय के इच्छुक मनखे मन मोबाईल नम्बर- 99267-56014,77729-22032, 87199-10005 म सम्पर्क करके पौधा मंगा सकत हें।
