कच्चा घर म रहइया 34088 मनखे मन ल मिलीस पक्का घर के सहारा
बलरामपुर 08 जनवरी 2024। मनखे अपन जीवन म रोटी, कपड़ा अऊ मकान जइसे जरूरत मन ल पूरा करे बर पूरा जिनगी मेहनत करथे। आर्थिक रूप ले कमजोर मनखे बर पक्का घर एक सपना जइसे होथे, फेर केन्द्र सरकार के मंशा के मुताबिक शासन के महत्वाकांक्षी योजना मन के समुचित लाभ समाज के हरेक नागरिक तक पहुंचाए जात हे, ताकि समाज के हर वर्ग के समुचित विकास हो सकय। इही महत्वकांक्षी योजना मन म ले एक हे प्रधानमंत्री आवास योजना। प्रधानमंत्री आवास योजना उंखर सपना साकार करत हे, जिंंकर आधा जिनगी कच्चा मकान म गुजर गे अऊ जब उंखर खुदके सपना सच होवत हे त वो खुशी ऊंखर बर का मायने रखथे ये बात शब्द म बता पाना मुश्किल हे।
प्रधानमंत्री आवास योजना ले विकासखण्ड शंकरगढ़ के ग्राम पंचायत मानपुर के निवासी श्री शिवप्रसाद जेकर उमर 58 साल हे, वो अपन कच्चा मकान म परिवार के संग जीवनयापन करत रहिस, ओखर बताती वोकर पूरा परिवार के जिम्मेदारी वोखरे खांध म हे। ओ ह किसानी अउ मजदूरी करके अपन परिवार के पालन पोषण करत हे। वो ह अपन संघर्ष के दिन के सुरता करत बताइस कि वो ह कभू नइ सोचे रहिस कि अपन ये जीवन म ओ ह पक्का मकान म अपन परिवार के संग रहि पाही। वोखर बर पक्का मकान एक सपना जइसे रहिस। ओ ह बताइस कि खपरा के मकान म रहना मुश्किल होत रहिस, बरसात के दिन म घर के भीतर पानी आ जात रहिस अऊ ठण्ड के दिन म ठण्ड ले बचना मुश्किल हो जात रहिस। बदलत मौसम के संग तकलीप घलोक बदलत रहीस संगेच समय के संग रेत, गिट्टी, सीमेंट अऊ ईंट के खरीदी कीमत घलोक बहुत महंगी हो गे रहिस। फेर शासन के प्रधानमंत्री आवास योजना वोखर पक्का घर के सपना ल साकार करिस। प्रधानमंत्री आवास योजना अंतर्गत साल 2019-20 म पक्का घर बनाए बर शासन ले स्वीकृति प्रदान करे गीस। शासन ले अनुदान म मिले सहयोग राशि अऊ खुद के बचत राशि ल मिलाके वो ह पक्का मकान बना लीस। अब पक्का मकान बन जाय ले ओ मन अपन परिवार के संग पक्का मकान म खुशहाल जीवन यापन करत हे। जेखर बर उमन शासन ल धन्यवाद ज्ञापित करे हें।
जानबा हे कि प्रधानमंत्री आवास योजना के तहत जिला म वित्तीय साल 2016-23 तक 44188 घर स्वीकृत हे, जेमे ले आज तक 34088 घर पूरा हो गे हे अऊ 10100 घर अभी निर्माणाधीन हे।