बांस शिल्प : आर्थिक स्वावलंबन के बनिस आधार

रायपुर, बांस शिल्प प्रशिक्षण केंद्र नारायणपुर शिल्‍पी मन बर आर्थिक स्वावलंबन के आधार बन गए हे। जिला के स्थानीय ग्रामीण अऊ इहां के जनजाति के मनखे मन बांस शिल्प के महत्व ल समझथें। इहां के मनखे मन बांस के काम प्रमुखता ले करके बहुत अकन उपयोगी मनमोहक अऊ आकर्षक चीज मन के निर्माण करत हें। बांस शिल्प के प्रति स्थानीय मनखे मन के रूचि के सेती नारायणपुर म बांस शिल्प प्रशिक्षण केंद्र के स्थापना करे गए हे। ये प्रशिक्षण केंद्र म स्थानीय निवासी मन ल बांस शिल्प के संगें-संग बेल मेटल अऊ काष्ठ कला के घलोक प्रशिक्षण देहे जात हे। बांस शिल्प सामान्य सुविधा केंद्र के प्रमुख उद्देश्य इहां के जनजातीय परिवार जऊन परंपरागत रूप ले शिल्प काम म संलग्न हें उनला प्रशिक्षण के माध्यम ले रोजगार उपलब्‍ध कराए जात हे। साल 2019-20 म 20-20 हितग्राही मन ल बांस शिल्प म उन्नत प्रशिक्षण दे गीस जेखर से ऊंखर कला कौशल म गुणात्मक सुधार होए के संगें-संग स्थानीय स्तर म मांग मुताबिक अपन खुदे रोजगार प्राप्त करत हें। इमन बांस ले सोफा सेट, टेबल, कुर्सी, स्टील मोड़ा, पलंग सेट अउ सजावटी अउ कई ठन प्रकार के उपयोगी सामान बनावत हें।