शासन के मदद अऊ खुद के मेहनत ले हुसैन ह अपन रद्दा खुदे बनाइस

मल्चिंग विधि ले केला के खेती ले होइस 15 लाख के आमदनी

बिलासपुर, जिला के विकासखण्ड तखतपुर के ग्राम बिनौरी म 15 एकड़ म केला के खेती मल्चिंग विधि ले करके शकील हुसैन ल ये साल 15 लाख के आमदनी होए हे। हुसैन परम्परागत फसल के खेती ले हट के बड़का रकबा म केला अऊ पपीता के उत्पादन करत हे। जेखर से ओ मन ल बनेच आमदनी मिलत हे।
हुसैन ह बताइस के ओ ल ये योजना के संबंध म जानकारी उद्यानिकी विभाग ले मिलीस। जानकारी मिले म मैं ह उन्नत तकनीक ले खेती करे के मन बना लेंव। वो ह बताइस के ओ ह सबो मनखे जइसे हमेशा चाहत रहिस के अपन परिवार के भरण पोषण बने सहिन कर सकय। आज ओखर ये सपना शासन के सहयोग ले पूरा होवत हे।
वो ह बताइस के उद्यानिकी विभाग कोति ले ओ ल बेरा-बेरा म मार्गदर्शन अऊ पूरा सहयोग देहे जात हे। वोला ये योजना के तहत् अनुदान घलोक देहे गीस। 15 एकड़ म केला के खेती मल्चिंग विधि ले करिस। ये पद्धति म खरपतवार ले फसल के बचाव होथे अऊ मजदूरी के खरचा घलोक कम परथे। वोकर बताती केला के खेती म कम लागत आथे अऊ एखर मार्केटिंग बहुत आसान हे। प्रति एकड़ फसल म एक लाख रूपिया तक के आमदनी हो जाथे। एखर अकतहा वो ह ये साल चार एकड़ म पपीता के घलोक खेती करे हे। उद्यानिकी विभाग कोति ले सिंचाई बर ड्रीप पद्धति ले सिंचाई के सुविधा घलोक उपलब्‍ध कराए गए हे। उन्नत तकनीक ले केला अऊ पपीता के उत्पादन वोखर बर फायदा के सौदा बन गए हे।