केला तना ले रेशा निर्माण यूनिट अऊ दाल मिल प्रसंस्करण ईकाइ के प्रभारी सचिव ह करिस मुआयना

बेमेतरा, जिला के प्रभारी सचिव सुश्री रीता शांडिल्य ह आज एक दिवसीय बेमेतरा जिला के प्रवास के समय विकासखण्ड साजा के गौठान ग्राम राखी म संचालित केला तना रेशा निर्माण यूनिट के निरीक्षण करिन। ये बेरा म उमन कहिन कि प्रदेश सरकार कोति ले गौठान मन ल ग्रामीण आजीविका के ठौर (ठिया) के रुप म विकसित करे बर सुराजी गांव योजना के तहत हर संभव प्रयास करे जात हे। प्रदेश के हर गौठान ल रूरल इंडस्ट्रियल पार्क के रूप म विकसित करे जात हे। राखी गांव के गौठान म जिला खनिज संस्थान न्यास (डीएमएफ) ले केला तना ले रेशा निर्माण यूनिट के स्थापना करे गए हे। जिहां महिला स्व सहायता समूह के बहिनी मन केला तना ले रेशा निर्माण करत हें, एकर उपयोग कर्टन (पर्दा), टेबल मेट, पेन स्टैण्ड, सजावटी बैग आदि बनाए म होवत हे। उमन महिला स्व सहायता समूह ल आत्मनिर्भर बने के दिशा म जिला प्रशासन जउन काम करत हे तेला सहराईन।
एकर बाद उमन दाल प्रसंस्करण ईकाइ ग्राम महीदही (भैंसामुड़ा) के अवलोकन करिन। ये बेरा म उमन दाल मिल के क्षमता के जानकारी लीन। कृषि विज्ञान केन्द्र ढोलिया के कृषि वैज्ञानिक मन ह बताइन कि दाल उत्पादन बर जरूरी सामान सहकारी समिति मर्यादित साजा के किसान उत्पादक संगठन के कृषक मन के माध्यम ले तिवरा, चना, मसूर, राहेर के संग्रहण करके दाल निष्कासन काम करे जात हे। ये प्रकार ले दाल प्रसंस्करण के संग चुनी अऊ भूसी घलोक पशुपालक किसान मन ल उचित दर म देहे जात हे। प्रभारी सचिव सुश्री शांडिल्य ह दाल मिल म दाल के उत्पादन के बाद कहां-कहां अऊ कोन माध्यम ले निर्यात करे जात हे एखर जानकारी लीन। ये बेरा म कलेक्टर श्री विलास भोसकर संदीपन, जिला पंचायत सीईओ श्रीमती लीना मण्डावी संग आन अधिकारी उपस्थित रहिन।