रइपुर, 21 जून 2021 सम्मार। मुख्यमंत्री दाउ भूपेश बघेल ल सुकमा जिला के रामाराम गांव वाले मन नक्सल गतिविधि के चलत 13 बछर ले बंद परे स्कूल ल फेर शुरू कराके लइका मन ल पढ़े —पढ़वाए के सुविधा देहे बर विशेष रूप ले जय—जोहार के संदेश भेजवाए रिहिने । रामाराम गांव म पदस्थ शिक्षादूत श्री अशोक कुमार ह आज सुकमा जिला मुख्यालय म आयोजित लोकार्पण अउ भूमिपूजन कार्यक्रम के बेरा मुख्यमंत्री दाउ बघेल ले लाइव चर्चा के बेरा जब रामाराम गांव के लोगन कोति ले मुख्यमंत्री के जय जोहार के संदेश सुनाइन त मुख्यमंत्री दाउ भूपेश बघेल ह शिक्षादूत ले कहीन कि आपो ह गांव लहुट के सबो झन ल मोर जय जोहार करिहौ।
रामाराम गांव सुकमा जिला के नक्सल प्रभावित गांव हेर जिहां बीते तेरह बछर ले नक्सल गतिविधि के चलत स्कूल बंद परे रिहिस। मुख्यमंत्री दाउ भूपेश बघेल के विशेष पहल ले गांव म प्राथमिक स्कूल फेर शुरू होगे हे । शिक्षादूत श्री अशोक कुमार ह मुख्यमंत्री दाउ भूपेश बघेल के गांव के सबो लोगन कोति ले अभिवादन करत ओकर आभार जताइन अउ कहीन कि आपके सेति रामाराम गांव जइसन कईयो ठिन गांव के छूटत लइका मन ल फेर शिक्षा सुविधा सुलभ हो सके हे। रामाराम गांव के प्राथमिक शाला म लइका दर्ज हवय अउ वोमन सरलग स्कूल पढ़े बर आथे । श्री अशोक कुमार ह शिक्षादूत मन के मानदेय ल बढ़ाए बर तको मुख्यमंत्री ल धन्यवाद दीन।
तेरह बछर ले बंद परे स्कूल फेर होइस शुरू
