- सेलम, चेन्नई, हैदराबाद अऊ उड़ीसा म बंधक मजदूर रहिन लइका
- कोंडागांव पुलिस ह पांच आरोपी मन ल करिस गिरफ्तार
- पुलिस के ‘संवेदना योजना’ के तहत चलाए गए ऑपरेशन ल मिलीस कामयाबी
रायपुर, छत्तीसगढ़ पुलिस ल मानव तस्करी के रैकेट तोड़े म बड़का सफलता मिले हे। संवेदना योजना के तहत चलाए गए ऑपरेशन म पुलिस ह सेलम, चेन्नई, हैदराबाद अऊ ओडिशा के कुछ शहर मन म छापा मारके 70 ले जादा बंधक लइका मन ल मुक्त कराए हे। पूरा अभियान म छत्तीसगढ़ के कई ठन जिला मन के 42 बालिका मन 28 बालक मन ल सकुशल रेस्क्यू करके वापस लाए गए हे। कार्रवाई म पांच आरोपी गिरफ्तार करे गए हे।
कोंडागांव पुलिस ल सूचना मिले रहिस कि जिला के बालक-बालिका मन, महिला मन ल कुछ मनखे जादा पइसा म काम देवाए के लालच देके आन राज्य आन्ध्रप्रदेश ,तमिलनाडु, ओडिशा आदि म बंधुआ मजदूर के जइसे काम करवावत हें। पुलिस ल गंवाए बालक-बालिका मन के पतासाजी के समय सी.सी.आर.एस. प्रोजेक्ट सेलम तमिलनाडु के काउंसलर वेद भटटाचार्य के माध्यम ले छत्तीसगढ़ के बालक-बालिका मन के सेलम म होए के सूचना मिलीस। जऊन म जल्दी कार्यवाही करत पुलिस ह बालक-बालिका मन ल ओ जगा ले रेस्क्यु करके सुरक्षित घर लाय के उद्देश्य ले जिला पुलिस कोण्डागांव, जिला बाल संरक्षण इकाई कोण्डागांव के संघरा रेस्क्यू टीम तियार करके बंधक मन ल छोड़वाए बर सेलम टीम रवाना करे गीस अउ बंधक मन ल छोड़वाए गीस।
कोंडागांव पुलिस अधीक्षक श्री सुजीत कुमार ह बताइस कि सिटी कोतवाली थाना कोण्डागांव कोति ले पीडि़त बालिका के मां ह रिपोट दर्ज कराईस कि महिना सितम्बर-अक्टूबर 2018 म आरोपी जयराम सलाम पिता सिलाराम निवासी गचुमकल मड़ानार, उमेश कुमार मण्डावी पिता समलूराम निवासी गुटापारा, जैतराम नेताम पिता मालू नेताम निवासी बागझर अउ आन ह ओखर बेटी अउ क्षेत्र के आन बालक-बालिका मन ल बहला फुसला के जादा मजदूरी देवाए के लालच देके चेन्नई लेगे जिहां ओ मन ल बंधक बनाके काम लेहे जात रहिस। इहां तक कि बीमार रहे म घलोक मजदूरी कराए जात रहिस। फेर ओ आरोपी धमकी देके क्षेत्र ले बालक बालिका मन ल मजदूरी कराए अपन संग ले जाते रहिस।
पूरा जानकारी मिलतेच थाना कोण्डागांव पुलिस कोति ले आरोपी मन के विरूध्द अपराध क्र0-335/2019 धारा 370,34 भा.द.वि. के तहत एफ.आई.आर. दर्ज करके प्रकरण उपर कार्यवाही करे गीस अउ आरोपी मन ल गिरफ्तार करके जेल भेजे गए हे अऊ सबो बंधक मन ल सकुशल रेस्क्यू करके विधिवत परिजन मन ल सुपुर्द करे गीस।
अइसनहे थाना माकड़ी अउ फरसगांव क्षेत्र म घलोक जादा मजदुरी के लालच अउ झांसा देके दूसर राज्य ले जाय अउ जबरन बंधक बनाके मजदूरी कराए अऊ मजदूरी के बाद रूपिया घलोक नइ देहे जइसे सूचना मिले म पीडि़त पक्ष के आवेदन म एफआईआर दर्ज करे गीस अऊ प्रकरण के सबो बंधक मन ल मुक्त कराए गीस।
एकर अकतहा तमिलनाडु, गोवा, आंध्रप्रदेश, दिल्ली, आदि राज्य मन के कई ठन कारखाना अऊ आन जगा मन म छत्तीसगढ़ के करीबन 300 बालक-बालिका, मजदुर मन ल बंधक बनाके काम कराए के सूचना मिले हे जिंनला रेस्क्यू करे बर टीम रवाना करे जात हे।
डीजीपी श्री डी.एम. अवस्थी ह बताइस कि संवेदना योजना के तहत राज्य पुलिस लगातार महिला मन के विरूद्ध अपराध अऊ मानव तस्करी रोके बर छापामार कार्रवाई करत हे। इही क्रम म कोंडागांव पुलिस कोति ले ऑपरेशन चलाए गीस अऊ सत्तर लइका मन ल मुक्त कराए गीस। सबो जिला मन म ये ऑपरेशन आगू घलोक लगातार जारी रहिही।
